ناوەندی هەواڵ

 

زیاتر لە ٨٠ چالاکوانی مافی ژنان بەیاننامەیەکیان بڵاوکردەوە و هۆشدارییاندا لە دۆخی زیندانی سیاسی کورد سەعدا خدیرزادە، کە دوای هەڕەشەی هێزە ئەمنییەکانی زیندانی ناوەندی ورمێ ویستوویەتی خۆی بکوژێت.

 

تاوانێکی سیستماتیک دژی ژنان

ژنانی چالاکوانی مافی مرۆڤ و ژنان لە بەیاننامەکەیاندا ڕایانگەیاند: "هەوڵی خۆکوشتنی سەعدا خدیرزادە لە ئێران کوشتنێکی سیستماتیکە دژ بە ژنان، داوای پشتیوانی و بڵاوکردنەوەی کەیسی هاوشێوەی زیندانیانی ژن لە ئێران دەکەین. داوا لە هەموو چالاکوانانی مرۆیی، مەدەنی و سیاسی دەکەین، مافەکان بپارێزن، هەروەها هەموو ڕێکخراوە میدیاییەکان، پشتگیری جددی لە بارودۆخی زیندانییە ژنەکان بکەن".

 

سەعدا خدیرزادە، زیندانی سیاسی تەمەن ٣٢ ساڵ، دایکی دوو منداڵە و لە ١٤ی تشرینی یەکەمی ٢٠٢١دا لەلایەن هێزە ئەمنییەکانەوە دەستگیرکرابوو، تا ئێستا هیچ زانیارییەک لەبارەی هۆکاری دەستگیرکردنیەوە نییە.