ناوەندی هەواڵ

 

پلاتفۆرمی یەکڕیزی ژنانی کورد بۆردومانی دەوڵەتی تورکیای لە گوندی پەرەخی زاخۆ لە هەرێمی کوردستان شەرمەزار کرد و بەیاننامەیەكی نووسراوی بڵاوكردەوە و ڕایانگەیاند: "لە رۆبۆسکییەوە تا شەنگال، لە عەفرینەوە تا مەخمور دەیان جار ژن و منداڵ لە ماڵەکانیاندا بە تۆپبارانی داگیرکەران کوژراون، ساڵانێکە ئێمە لە هەر چوار پارچەی کوردستان داوا دەکەین شەڕ بوەستێنن و یەکڕیزی لەنێوان هەموو لایەنە کوردستانییەکان دابمەزرێنن"، هەروەها ئاماژەیان بەوەدا کە پێویستە ژنانی کورد زیاتر لە دژی لەشکرکێشی و هێرشەکان دەنگ بەرز بکەنەوە.

 

بانگەوازی بۆ یەکڕیزی

لە درێژەی بەیاننامەکەدا هاتووە: "ئێمە پلاتفۆرمی یەکڕیزی ژنانی کورد، ئەم هێرشە بۆ سەر خەڵکی سڤیل ئیدانەی دەکەین، دژی کوشتنی خەڵکی سڤیل و تاڵانکردنی کوردستان، داوا لە ژنانی هەر چوار پارچەی کوردستان دەکەین کە بەرامبەر بەم شەڕە دڕندانەیە هەڵوێست بنوێنن و تێکۆشانی یەکێتی ژنانی کورد و گەلی کورد بەگوڕتر بکەن".