ناوەندی هەواڵ

 

لە چەند ڕۆژی ڕابردوودا، کە هێرشی چەتەکانی جۆلانی بۆ سەر ڕۆژئاوای کوردستان دەستی پێکرد، دیمەنی چەتەیەک بڵاوبوویەوە کە کەزی (پرچ)ـی شەڕڤانێکی ژنی بڕیوە و بێڕێزی دەکات، دەستبەجێ لە هەموو بەشەکانی کوردستان و تەنانەت چالاکوانانی ژن لە وڵاتانی عەرەبی، کاردانەوەی لێکەوتەوە.

 

ژنانی کورد و عەرەب، لە بەرامبەر ئەو بێڕێزییەدا هەڵمەتی “کەزییەکمان ببڕنەوە هەزاران دەهۆنینەوە”ـیان دەست پێکرد و قژی خۆیان دەکرد بە کەزی و لە تۆڕە کۆمەڵایەتییەکان بڵاویان کردەوە.

 

نەک تەنها ئەوەش بەڵکو هەڵمەتی کەزی خۆی خزاندە ناو دونیای هونەریشەوە، بۆ ئەو مەبەستە، گۆرانی “کەزییەکانی کچی کورد” کە شعیرەکەی لەلایەن دەلیل جەمالەوە نووسراوە و دانا هەڵەبجەیی بەرهەمی هێناوە، بڵاوکرایەوە.