ناوەندی هەواڵ

 

ڕاپەڕینی گەلانی ئێران بە کوشتنی ژینا ئەمینی بە دەستی پۆلیسی ڕەوشت لە تاران دەستیپێکرد و لە حەوتەمین هەفتەدا سەرەڕای سەرکوتی خوێناوی بەردەوامە، سەدان هاوڵاتی بە دەستی هێزە سەربازییەکان کوژراون و بە هەموو شێوازێک توندوتیژی بەکاردەهێنرێت لەلایەن ڕژێمی ئێرانەوە و هەموو بەڵگەی تاوانەکانی ئەم ڕژێمە لەبەردەستدایە، لە نوێترین گرتە ڤیدیۆییدا کە بڵاوکراوەتەوە، دەریدەخات هێزە سەرکوتکەرەکانی ڕژێم هەڕەشەی سەربڕینی ژنان و بنەماڵەکانیان دەکەن.

 

گرتە ڤیدیۆکە لە میدیاکانی سەر بە دەسەڵاتەوە بڵاوکراوەتەوە و تیایدا دەریدەخات، شەوی ڕابردوو، ٣١ی تشرینی یەکەم، ژمارەیەک هێزی سەرکوتکەر لە ڕێگەی بڵندگۆکانیانەوە لە شەقام و کوچە و کۆڵانەکانی شارۆچکەی ئەکبەتان لە تاران هەڕەشە لە خەڵک دەکەن و دەڵێن: "ئەگەر شەرەفمان بپارێزین، ڕێگە نادەین زیان بەم وڵاتە بگەیەنێت".

 

ترسی حکومەت و هێزە سەرکوتکەرەکانی لە ڕاپەڕینێکی جەماوەری، بووەتە هۆی زیادبوونی توندوتیژیی چونکە شۆڕشی ژنان لە ئێراندا ڕێچکەی خۆی گرتووە و لە بەرامبەردا بە سووکایەتیکردن بە ژنان و بنەماڵەکانیان و هەڕەشەی سەربڕین لێیان دەیانەوێت ڕاپەڕینی گەلانی ئێران سەرکوت بکەن و دەنگی ژنان بێدەنگ بکەن.