ناوەندی هەواڵ

 

ئەمڕۆ لە کۆنگرەیەکی ڕۆژنامەنووسیدا لە بەیروتی پایتەختی لوبنان، دەستپێشخەری نون بۆ ئازادی ئۆجالان، کە پێکدێت لە دەستەیەکی ژنانی چالاکوان، سیاسەتمەدار و کەسایەتی وڵاتانی ڕۆژهەڵاتی ناوەڕاست و باکوری ئەفریقا، بەیاننامەیەکیان بۆ ڕایگشتی خوێندەوە و تێیدا ئاماژەیان بەوەدا، "شۆڕشی ئێمە شۆڕشی ژنانە، جوانترین ژن ئەو ژنەیە کە ئازادانەتر دەژی، من نابمە هاووڵاتی وڵاتێک کە ژن تێیدا دەکوژرێت".

 

لە بەیاننامەکەدا هاتووە: وەک ژنانی چالاکوان بۆ داکۆکیکردن لە ڕیبەر عەبدوڵا ئۆجالان، کە بە قەڵەم و هزری داکۆکی لە ژنان دەکات و ماوەی ٢٣ ساڵە بە هەڕەمەکیانە لەلایەن دەسەڵاتدارانی دەوڵەتی تورکیاوە دەستگیرکراوە و بە ناهەق گۆشەگیری توندی لەسەر بەڕێودەبرێت، بە دەستی ژنانی لوبنانی، فەلەستینی، عێراقی، سوری، لیبیایی، یەمەنی، میسری و سودانی، یەکەم هێڵی دەستپێشخەرییەکەمان کێشا کە ئەمڕۆ لە پای ڕووناکی هەموو هەوڵەکان خۆی ڕادەگەیەنێت، دەستپێشخەریی نون بۆ ئازادیی ئۆجالان، دەستپێشخەرییەکی فێمینیستییە کە لەلایەن کۆمەڵێک چالاکوانی ژنان لە ڕۆژهەڵاتی ناوەڕاست و باکووری ئەفریقاوە پێکهاتووە.

 

دەستپێشخەرییەکە تۆوێکە لە هەناوی ئەمرۆدا

لە درێژەی بەیاننامەکەدا، دەستپێشخەری نون بۆ ئازادی ئۆجالان، ئاماژە بەوەدەدات کە ئامانجیان ناساندن و بڵاوکردنەوەی زیاتری هزری ڕێبەر عەبدوڵا ئۆجالان و خستەڕووی خەباتی بێوچانی ئەو ڕێبەرەیە لەپێناو ئازادی گەلانی چەوساوە، "دەمانەوێت لە ڕێگەی دەستپێشخەرییەکەوە تیشک بخەینەسەر ئەو هزرە مرۆڤایەتییەی کە لەلایەن دەسەڵاتدارانەوە زەوتکراوە، بەڵام هزری ڕێبەر ئۆجالان بووە پردی ڕووناکی و گەشتە هەموو ئەو کەسانەی باوەڕییان بە مرۆڤایەتی هەیە، هەروەها دەستپێشخەرییەکە دەبێتە تۆوێک و لە هەناوی ئەمڕۆدا نێژرابێت، بۆ بەدەستهێنانی هەموو ماف و داوا یاسایی، سیاسی و میدیاییەکان و شکاندنی کۆتەکانی دەستبەسەرکردن و ڕەتکردنەوەی کاری نامرۆڤانە و نایاساییەکانی ڕژێمی تورکیا و ئاشکراکردنی پێشێلکارییەکان".

 

لە کۆتایدا دەستپێشخەری نون بۆ ئازادی ئۆجالان لە سۆنگەی باوەڕییان بەوەی کە ماف دەسەندرێت و نادرێت، لەسەر بنەمای شۆڕشی ژن لە لوبنانەوە ڕایانگەیاند، "سڵاو لە هەموو گەلە یاخی و چەوساوەکان، لەو گەلانەی لەپێناو سەلماندنی هەبوونی خۆیان تێدەکۆشن، لێرەوە دەستمان بۆ هەموو ڕێکخراو و کۆمەڵەی ژنان و کەسایەتییەکان درێژ دەکەین تا پێکەوە قەڵغانێک پێکبهێنین دژی هەموو نادادپەروەرییەک و دەستگیرکردنی بیرمەندی نەتەوەیی عەبدوڵا ئۆجالان".