ناوەندی هەواڵ

 

شۆڕشی ژینا شۆڕشێکە کە جیهانی گرتەوە، نەک تەنها بۆ ڕووخانی ڕژێمی ئێران بەڵکو شۆکێک بوو بۆ دڕندەیی و بەربەرییەت لە جیهان، لە هەموو شوێنێکی ئەم زەوییە دەنگی ژن، ژیان، ئازادی دەبیسترێت، ئەمە تەنها دروشم نییە، بەڵکو پێویستە لەگەڵیدا بژین، شێوازێکی ژیانە کە لە دونیای ئەمڕۆدا پێویستە، جا چ جیهانی پیشەسازی و پێشکەوتوو بێت کە ژن وەک کاڵا و لە شێوەی بوکە شووشە نمایش دەکات، یان ئەو جیهانە تەقلیدییەی کە هێشتا ژن وەک مرۆڤێکی ناتەواو دەناسینێت کە تەواوکەری پیاوە.

 

شۆڕشی ژینا ڕووبەڕووی مرۆڤ دەبێتەوە بە چەندین پرسیار و هانیدەدات بۆ بیرکردنەوە و هۆشیاربوون و ڕووبەڕووی ئەو واقیعانە دەبێتەوە کە ساڵانێکە لەژێر سایەی ئایین و کلتوور و یاسا شاردراوەن.

 

ئەم دەمامکە کۆنە ئەو ئەهریمەنییە لادەبات کە دوژمنانی هۆشیاری هەزاران ساڵە لەسەر ڕووخساری هەر مرۆڤێکیان داناوە، بێ هۆ نییە شۆڕشی ژینا گەنج و پیر و ژن و پیاو و دیندار و غەیرە ئایینی کۆکردۆتەوە و ڕیز کردووە.

 

یاخیبوونێک بۆ هەموو کاتێک

بیرۆکەیەکی هەڵەیە ئەگەر وا بیر بکەینەوە کە دوای سەرکەوتن و لە داهاتووی ئێراندا خەباتی " ژن، ژیان، ئازادی" کۆتایی دێت، ڕاستییەکە ئەوەیە کە ڕێگایەکی دوور و درێژمان ماوە لە داهاتووی ئازادیدا، ئەرکی پەروەردەکردنی منداڵمان لەسەر شانە، کە ئەو منداڵانەی کە ژن و ژیان وەک شتێک لە دەرەوەی ئێستا خەیاڵ دەکەن، هەنگاو بنێنە سەر ئەم ڕێگایە، بۆ ئەوەی ئازادی ڕاستەقینە دروست بکەن و ناچار نەبن خۆیان بدەنە دەست ئەو دیلێتیەی کە ئێمە پێمان بەخشیوون.

 

منداڵانی " ژن، ژیان، ئازادی" منداڵی خۆڕاگرین، لەو ئاگرەی کە دایکانیان هەڵگیرساند و هیچ ئومێدێکیان بۆ کوژاندنەوەی نییە، لە ڕەچەڵەکی ژنێکەوە کە سەرکردە نییە، پیرۆز نییە بەڵکو خەباتکارە و شەریف و شۆڕشگێڕانە پیاو و ژن پەروەردە دەکات.

 

منداڵانی " ژن، ژیان، ئازادی" ئاگری ژێر خۆڵەمێشن

ئەو تێکۆشەرانەی بەرگەی شەهیدبوون دەگرن بەڵام بەرگەی دیلێتی ناگرن، ئازادانە دەژین بەڵام چۆک دانادەن، خۆڵەمێشی ژێر ئاگرن کە ئەگەر با لە دوژمنەوە هەڵبکات، دەگیرسێنن، منداڵانی " ژن، ژیان، ئازادی" ژیان بە ئازادی دەڕازێننەوە، بە پراکتیزەکردنی یەکسانی دەبنە بانگخوازی دادپەروەری بۆ هەموو جیهان.

 

ڕەنگە شۆڕشەکەی ژینا ئەو شۆڕشە بێت کە جیهان چاوەڕێی دەکات، هەمان دادپەروەری، هەمان یەکسانی، هەمان ئازادی بیروڕا و قبوڵکردنی جیاوازی و نەهێشتنی هەڵاواردن، کە بە سەرکەوتنی دەتوانین هیوای ژیانێکی ڕاستەقینە و ئینسانانە بخوازین، ئەگینا شۆڕشی ژینا تا بەرەبەیانی ئازادی بەردەوام دەبێت و بەرخۆدان تا "ژن، ژیان، ئازادی" بەردەوام دەبێت.