ناوەندی هەواڵ

 

دوێنێ لە کاتی نوێژی هەینی هێزە ئەمنی و سەربازییەکان ڕژانە شەقام و ڕێڕەوەکانی دەوروبەری مزگەوتی مەسلە و مەکییان لە زاهیدان تەنی بوو، دۆخی ئەمنی شارەکە چڕتر کرابووەوە و گەڕان و پشکنین بۆ هاوڵاتیان ئەنجام دەدرا، هەواڵە پەیوەندیدارەکانیش ئاماژە بەوە دەکەن، کە ژنانی بەلووچ لەلایەن هێزە ئەمنییەکانەوە، کە ژنن، پشکنینی جەستەیان بۆ کراوە.

 

هێزە سەربازی و ئەمنییەکان لە شەقامەکانی خەیام، چوارڕیانی بەهداشت، تەوحید، مەدانی، خوڕەمشار، ڕازی و مودەریس خاڵی پشکنینیان دامەزراندووە و لە کوچە و کۆڵانەکانی دەوروبەری مەسلە و مزگەوتی مەکی چادریان داناوە، جگە لەوەش چەند وێنەیەک بڵاوکراونەتەوە، کە لە قوتابخانەکاندا بنکەی سەربازی دانراون و دەیان هێزی سەربازی لە قوتابخانەی دانش کە دەکەوێتە شەقامی بەهداشتی زاهیدان، لە دەوروبەری مزگەوتی مەکی جێگیرکراون.