ناوەندی هەواڵ

 

ئەمڕۆ، ٢٧ی تشرینی یەکەم، دوای بەخاکسپاردنی یەکێک لە قوربانیانی شەوی ڕابردوو لە شاری مەهاباد، هاوڵاتییان بە گردبوونەوەی بەرفراوان و وتنەوەی دروشم بەرەو فەرمانگە و شوێنە حکومییەکان ڕێپێوانیان کرد و هەوڵی کۆنترۆڵکردنی بەشێک لە ناوەندەکانیان دا.

 

باس لەوەدەکرێت کە خۆپیشاندەران بە دروشمی "مەرگ بۆ دیکتاتۆر، کوردستان گۆڕستانی فاشیستان، هەتا کوردێک بمێنێ کوردستانیش دەمێنێ" هێرشیان کردووەتە سەر بنکەی پۆلیسی ١١ و ١٣، فرۆشگای کۆرۆش و کۆنترۆڵیان کردووە، هەروەها هەواڵەکان ئاماژە بەوەدەکەن کە فەرمانداری مهاباد کەوتووەتە دەستی خەڵک.

 

ئەو وێنانەی بڵاوکراونەتەوە دەریدەخەن کە ئیدارەی دارایی و کۆمیتەی مەهاباد و بانکی ڕەفەح لەلایەن خۆپیشاندەرانەوە ئاگریان تێبەردراوە. خۆپیشاندەرا بەرەو شارەوانی شارەکە چوون و لە هەوڵی دەستبەسەرداگرتنی دان.

 

بەپێی زانیارییەکان هێزە سەرکوتکارەکانی کۆماری ئیسلامی لە گەڕەکی گومرگی مەهاباد تەقەیان لە خەڵک کردووە. لە ناوچەکانی دیکەی شارەکەش، پێکدادانەکانی نێوان خۆپیشاندەران و هێزە ئەمنییەکان بەردەوامە و تا ئێستا ئاماری قوربانیان و بریندارەکان لە بەردەستدا نییە.