لە ماوەی ساڵێکدا بەهۆی مینەوە هەزار کەس گیانیان لەدەستدا
یونیسێف ڕایگەیاند، ساڵی ڕابردوو ژمارەی قوربانیانی مین لە میانمار بەرزبووەتەوە و گەیشتووەتە زیاتر لە هەزار و ٥٢ کەس، کە ٪٢٠یان منداڵن.
ناوەندی هەواڵ
ململانێ ناوخۆییەکانی میانمار لە ساڵی ٢٠٢١ەوە نزیکەی ٢.٨ ملیۆن کەسی ئاوارە کردووە، هەروەها دانیشتووانی میانمار ڕووبەڕووی مەترسیی چێندراوی مین ببنەوە کە لە نزیک ماڵەکانیان یان لە قوتابخانە و گۆڕەپانی یارییەکاندا چێندراون.
دوێنێ، سندوقی منداڵانی نەتەوە یەکگرتووەکان یونیسێف، بەیاننامەیەکی بڵاوکردەوە و تێیدا بوونی مین لە هەموو ویلایەت و ناوچەکانی میانمار جگە لە نایپیداوی پایتەختی میانمار ڕاگەیاند و جەختی لەوە کردەوە کە ئەم دۆخە جێگەی نیگەرانییە.
ئاماژە بەوەکراوە لە ماوەی ساڵی ٢٠٢٢دا ٣٩٠ هاوڵاتی مەدەنی بەهۆی مینەوە گیانیان لەدەستداوە، هەروەها زیاتر لە هەزار و ٥٢ هاوڵاتی مەدەنی لە میانمار لە ماوەی ساڵی ٢٠٢٣دا بەهۆی تەقەمەنی دیکەوە لەدەست دراون، ئاماژەی بەوەشکردووە، ٢٠%ی ئەو کەسانەی گیانیان لەدەستداوە منداڵن.
دیبورا کومێنی، بەڕێوەبەری هەرێمی یونیسێف بۆ ڕۆژهەڵاتی ئاسیا و زەریای هێمن ڕایگەیاند، بەکارهێنانی مین تەنها کارێکی نامرۆڤانە نییە، بەڵکو پێشێلکردنی یاسای مرۆیی نێودەوڵەتییە، بە پێویستیشی زانی هەموو لایەنەکانی ململانێی میانمار واز لە بەکارهێنانی مین بهێنن بۆ دڵنیابوون سەلامەتی منداڵان و هاوڵاتیانی مەدەنی.