ناوەندی هەواڵ

 

خەڵک لە شارەکانی ئێران بە شێوازی جیاوازی وەک لە شەقام بوون، مانگرتن، نووسینی دروشم، بەیاننامە و هتد، ناڕەزایەتی لە دژی ساڵانی دڕندەیی و تاوانکارییەکانی ڕژێمی کۆماری ئیسلامی دەردەبڕن، ئەم ناڕەزایەتیانە تا شەوی ڕابردوو، ٢١ی تشرینی یەکەم بەردەوام بوو.

 

دوای هەینی خوێناویی زاهیدان، خەڵکی شارەکە هەموو ڕۆژ و بە تایبەت ڕۆژانی هەینی خۆپیشاندانی بەرفراوان بەڕێوەدەبەن. ڕۆژی هەینی، ٢١ی تشرینی یەکەم خەڵکی زاهیدان بە ڕژانە شەقامەکان و وتنەوەی دروشمی دژە حکومەت، جارێکی دیکە ناڕەزایەتییەکانیان بەرامبەر بە کۆماری ئیسلامی خستەڕوو، بە فەرمانی ئەحمەد تاهیریی، بەرپرسی پۆلیسی پارێزگای سیستان و بەلوچستان، لە خۆپیشاندانەکاندا ٥٧ کەس دەستگیرکراون و ئۆپەراسیۆنی دەستگیرکردنیش هەر بەردەوامە.

 

مەولەوی عەبدولحەمید، ئیمامی هەینیی زاهیدان، ئاماژەی بە کوژرانی خەڵک لە ڕۆژی هەینی خوێناویی زاهیدان کرد و ڕەخنەی لە بێدەنگیی دەسەڵاتدارانی کۆماری ئیسلامی گرت و عەلی خامنەیی بە بەرپرسی ئەم تاوانە ناوبرد، جەختیشیكردەوە، هیچ كەسێك ناتوانێت لەم بوارەدا خۆی لە بەرپرسیارێتی ڕزگار بكات.

 

هەروەها شارەکانی شووش، ئەسفەهان، تەبرێز، سنە، کرماشان، تاران و جوانڕۆ لە هەندێک گەڕەک و شەقامدا خۆپیشاندان ئەنجامدا.