فشارەکانی دەوڵەتی ئێران لە سەر زیندانیانی ژن لە زیادبوونە
لە شاری سنەی ڕۆژهەڵاتی کوردستان ژنێک سزای زیندان بۆ بڕایەوە و دوو زیندانی دیکەی ژن لە زیندانی ئێڤین لە چارەسەری و دەرمان بێبەشکراون.
ناوەندی هەواڵ
ماڵپەری دەنگی دەستگیرکراوەکانی کورد و ئێران لەبارەی سزادانی سێ ژن لە زیندانەکانی سنە و ئێڤین ڕایگەیاند، ژنێکی کورد بە ناوی شەیدا عەزیزی خەڵکی شاری سنەی ڕۆژهەڵاتی کوردستان لە لایەن لقی یەکەمی دادگای شۆڕشی سنەوە بە تۆمەتی "هەوڵدان بۆ تێکدانی ئاسایشی نیشتمانی" سزای سێ ساڵ زیندانی بەسەردا سەپێندراوە.
هەروەها ئاماژە بەوەکراوە، شەیدا عەزیزی لەکاتی شەڕی ١٢ڕۆژەی نێوان ئێران و ئیسرائیل لە شاری سنە بەبێ فەرمانی دادوەر دەستگیرکراوە و ڕەوانەی زیندان کرابوو، دوو زیندانی سیاسیی ژن بە ناوەکانی مەرزییە فارسی و فرووغ تەقی‌پوور لە زیندانی ئێڤین ڕووبەڕووی کێشەی تەندروستی بوونەتەوە و لە هەر جۆرە چارەسەرێکی پزیشکی بێبەشکراون و ڕووبەڕووی فشار بوونەتەوە.
ئەوەشخراوەتەڕوو، هەر دوو ژنە زیندانی سیاسی ناوبراو لە ساڵی ٢٠٢٣ هاوکات لەگەڵ ساڵیادی سەرهەڵدانی شۆڕشی "ژن، ژیان، ئازادی" دەستگیرکراون و ڕەوانەی زیندانی ئێڤین کراون، دواتر لە لایەن دادوەر ئیمان ئەفشاری لە تاران بە تۆمەتی "پەیوەندی لە گەڵ ئۆپۆزسیۆنەکانی دژ بە ئێران" هەر یەک سزای ١٥ساڵ زیندانیان بەسەردا سەپێندراوە.