ناوەندی هەواڵ

 

عێراق یەکێکە لەو وڵاتانەی ساڵانە لە وەرزی هاویندا شەپۆلی گەرمای توند ڕووی تێدەکات، لەگەڵ گۆڕانی کەشوهەوای جیهان بە گشتی، کاریگەری لەسەر زۆربەی وڵاتان هەبووە و بووەتە هۆی بەرزبوونەوەی پلەی گەرمی زەوی، ئەمەش دۆخەکەی بۆ عێراق سەختتر کردووە.

 

دەستەی کەشناسی عێراق بڵاویکردەوە، لە ٦ی تەمموزەوە پلەی گەرما بەشێوەیەکی بەرچاو بەرزدەبێتەوە و ڕۆژانی شەممە و یەکشەممەی هەفتەی داهاتووش لە بەشێک لە پارێزگاکانی باشووری عێراق پلەکانی گەرما تا ٥٢ پلە بەرز دەبنەوە.

 

لە هەرێمی کوردستانیش، بەپێی بڵاوکراوەی کەشناسی شەپۆلێکی گەرما ڕوو لە ناوچەکە دەکات و لە هەندێ ناوچە بەتایبەت گەرمیان پلەى گەرما دەگاتە ٤٤ پلە.

 

بە مەبەستی خۆپارێزی داوا لە هاوڵاتییان دەکرێت، زۆر خۆیان نەخەنە بەر خۆر بەشێوەی ڕاستەوخۆ، لە ڕۆژدا خۆیان نەشۆن و مەلە نەکەن و لەکاتی چوونە بەر خۆریش چەتر یان هەرشتێکی دیکە بەکار بهێنن.