عەبیر محەمەد

 

قامیشلۆ- ساڵی ٢٠٢٤ دەستەی ڕۆشنبیری باکوور و ڕۆژهەڵاتی سووریا بە پێشەنگایەتی تەڤگەری کولتووری میزۆپۆتامیا و بە هاوکاری زانکۆی ڕۆژئاوای کوردستان، بڕیاری کردنەوەی پەیمانگای باڵای هونەری بۆ یەکەمجار لە کانتۆنی جزیرە دا.

 

"کردنەوەی بەشی نوێ یارمەتی قوتابیان دەدات"

زۆزان محەمەد، مامۆستای فاکەڵتی زانستە کۆمەڵایەتییەکان و بەرپرسی بەشی ژنۆلۆژی لە زانکۆی ڕۆژئاوای کوردستان، باسی لە پەرەپێدانی خوێندن و خستنەڕووی بەشە نوێیەکان لە زانکۆ و پەیمانگاکان کرد و وتی: ئێمە ویستمان هاوکاری قوتابیان بکەین، لەبری ئەوەی لە مەودای دوور و شارە دوورەکانەوە بێن بۆ خوێندن لە قامیشلۆ، بەشەکانی ئێستا لە کۆبانێ و ڕمێلانیش کرانەوە، جگە لەوەش فاکەڵتی زانستە کۆمەڵایەتییەکان کە ٥ بەشی هەیە، لە ساڵانی ڕابردوودا لە زانکۆی ڕۆژاڤا دامەزرا، لە هەمان کاتدا ئەمساڵ پەیمانگای باڵای هونەر پێشوازی لە خوێندکارەکانی دەکات، ئەمەش یەکەمجارە هەنگاوێکی لەو شێوەیە لە ناوچەکەدا بنرێت.

 

"بەرەوپێشبردن و پاراستنی کولتوور و هونەر لەڕووی ئەکادیمیەوە پێویستە"

سیهام داود، بەرێوەبەری پەیمانگای باڵای هونەری ڕۆژئاوای کوردستان سەبارەت بە کردنەوەی پەیمانگاکە و گرنگی و ڕۆڵەکانی وتی: شۆڕشی ١٩ی تەمووز زۆر بواری بۆ خوڵقاندین، ڕۆشنبیری و هونەر یەکێکە لە دەستکەوتەکانی ئەم شۆڕشە، ئێمە پێویستمان بە پاراستنی کولتوور و هونەری باکوور و ڕۆژهەڵاتی سووریا هەیە بە شێوەیەکی ئەکادیمی و زانستی، بۆیە گرنگ بوو ئەم پەیمانگایە دابمەزرێندرێت.

 

سیهام داود ئاماژەی بەو ڕەنجە دا کە لە بواری پاراستنی کولتوور و هونەردا دەنرا، بەڵام کەسانی پسپۆڕ لە بوارەکەدا نەبوون یان کەم بوون لەو بارەیەوە وتی: وەک هەنگاوی یەکەم، پەیمانگاکە ٣ بەش لەخۆدەگرێت: سینەما، مۆسیقا و شانۆ. پەروەردە سێ ساڵ دەخایەنێت، دوو لەوانە تیۆری و یەکێکیان پراکتیکییە.

 

"پەیمانگاکە پشت بە میراتی گەلی کورد دەبەستێت"

سیهام داود ڕایدەگەیەنێت، ڕۆڵی سەرەکی پەیمانگا پاراستنی میراتی کولتووری گەلی کوردستانە و لە درێژەی قسەکانیدا دەڵێت: یەکەمین سیاسەت کە لە دژی گەلی کورد ئەنجامدراوە، جگە لە کوشتن و تاڵانکردن، هێرشکردنە سەر کەلتوور و هونەرە، گەلی کورد لە ڕێگەی هونەرەوە خۆی پاراستووە، لە ڕێگەی هونەرەوە ئازار و چیرۆک و مێژوو و خۆشەویستی نیشتمان و واقیعەکانی ئێستایان دەربڕیوە، ئەمەش ڕێگەی دا بناغەیەکی هونەری دروست بکرێت و لەم پەیمانگایەدا پەروەردە بە شێوەی ئەکادیمی دەدرێت.