شرناخ

 

لەیلا گوڤەن، هاوسەرۆکی کۆنگرەی کۆمەڵگەی دیموکراتیک "کەجەدە" کە لە ساڵیادی بەبیرهێنانەوەی ئینان لە ساڵی 2020 لێدوانی دابوو، بە بیانووی "سوورکردنی خەڵک بۆ ڕق و کینە" دۆسیەیەک لەسەری کرایەوە، دووەم دانیشتنی دادگاییکردنی لەیلا گوڤەن لە دادگای تاوانی ئاسلی سلۆپی ئەنجامدرا، لەیلا گوڤەن کە لە کەیسێکی دیکەدا دەستگیرکراوە، لە ڕێگەی سیستمی دەنگ و ڤیدیۆییەوە "SEGBIS" ئامادەی دانیشتنەکە بوو، هەروەها پارێزەرەکانیشی لە کۆبوونەوەکەدا ئامادەبوون.

 

"پێویستە کۆتایی بە گیان لەدەستدانی مرۆڤ بهێندرێت"

لەیلا گوڤەن لە کۆبوونەوەکەدا بەرگری لە خۆی کرد و ڕایگەیاند، پەشیمان نییە لەوەی لە بەبیرهێنانەوەی تایبەتی ئینان قسەی کردووە و ئەو تۆمەتەی لە دژی خۆی قبوڵ نەکرد، وتی: بەهۆی ئەوەی مافی مرۆڤ دەپارێزین هەمیشە دۆزمان لە دژ دەکرێتەوە، بە دڵنیاییەوە، ڕەخنە لە دەوڵەت و حکومەت دەکەین کە دەبنە هۆی گیان لەدەستدانی خەڵک، دەڵێین پێویستە شەڕ و پێکدادان کۆتایی پێبێت و ئاشتی بەدەست بهێندرێت، پێویستە کۆتایی بە گیان لەدەستدانی مرۆڤ بێت.

 

هاشم توغورلو، پارێزەری لەیلا گوڤەن، بەرگری لە بریکارنامەکەی کرد و داوای کرد کە لەیلا گوڤەن ئازاد بکرێت.

 

دوای بەرگریکردن، شاندی دادگا ڕایگەیاند کە قسەکانی لەیلا گوڤەم تاوان نەبووە و بڕیاری بێتاوانی دا.