سوەیدا

 

خۆپیشاندان و ناڕەزایەتی گەلی سوەیدا کە چووەتە دووەم مانگی خۆیەوە و جەخت دەکاتەوە لەو داواکارییانەی کە داوای گۆڕانکاری سیاسی و ڕووخاندنی "ڕژێمی سووریا" دەکەن.

 

سەدان کەس لە دانیشتووانی سوەیداو بە بەشدارییەکی فراوانی ژنان ڕۆژی شەممە ٣٠ی ئەیلوول لە گۆڕەپانی ئەلکەرەمە کۆبوونەوەو داوای مافە سەرەتاییەکانیان کرد، ئەویش ئازادی و ژیانێکی باشتر بوو، فریال عەریج وتی: ئێمە سووریایەکی ئازادمان دەوێت، ژیانێکی شیاو بۆ ئێمە و منداڵەکانمان و ژیانێکی ئاشتییانە لەسەر خاکەکەمان.

 

ئاماژەی بەوەشکرد، لە ئەنجامی فشاری ژیان و بارودۆخی سەختەوە بەشداری لە خۆپیشاندانەکەدا کردووەو هیچ دەستێوەردانێکی دەرەکی لە خۆپیشاندانەکاندا نییە، هەروەها پەیامێکی نارد بۆ هەموو ژنانی سووریا بۆ ئەوەی یەکگرتوو بن و بچنە ئەو گۆڕەپانانەو داوای مافە ڕەواکانیان بکەن.

 

لە لایەکی دیکە، ڕحاڤ عەریج ئاماژەی بەوەکرد، نادادپەروەری، سەرکوتکردن، گەندەڵی دەسەڵات و ماددە هۆشبەرەکان لە وڵاتەکەدا بڵاوبوونەتەوە، خەڵکی هێناوەتە ئەم قۆناغە وتی: تەنها دەتوانین چاکسازی لە یەک حاڵەتدا بکەین، ئەویش ڕووخاندنی ڕژێمی گەندەڵە و خۆبەڕێوەبەریمان دەوێت، بۆ ئەوەی بتوانین بە شکۆمەندی و ئازادی بژین.