ناوەندی هەواڵ

 

لەگەڵ نزیکبوونەوەی ڕۆژی جیهانی نەهێشتنی توندوتیژی دژ بە ژنان، هاوپەیمانی دیموکراتیکی ژنان لە ڕۆژهەڵاتی ناوەڕاست و باکووری ئەفریقا-نادا توندوتیژی دژ بە ژنانی شەرمەزار کرد و پشتیوانی خۆی بۆ شۆڕشی ئێران بە پێشەنگایەتی ژنان و هەڵمەتی "من ژیانم"م کە لەلایەن ڕێکخراوەکانی ژنانەوە دەستیپێکردووە، دەربڕی.

 

لە ڕاگەیەندراوەکەدا هاتووە: بەبۆنەی ڕۆژی جیهانی نەهێشتنی توندوتیژی دژی ژنان، ئەمساڵ هێشتا شاهیدی زیادبوونی بەرچاو و بێ وێنەی توندوتیژی دژ بە ژنانین لە سەرتاسەری جیهان، ئەمەش سەرەڕای گەشەسەندنی خەباتی فێمینیستی لە دژی هەموو جۆرەکانی توندوتیژی دژی ژنان و پێشێلکردنی ئاشکرای مافەکانیان، دەریدەخات کە سیستەمی سەرمایەداری جیهانی و عەقڵیەتی پیاوسالاری تاکڕەوانە چەندە لە ئیرادەی ژنانی ئازاد دەترسن و هەموو هەوڵێک دەدەن بۆ شکاندنی ئیرادەیان و بێدەنگکردنی دەنگیان و لێسەندنەوەی ماف و ئازادییان یاساکان.

 

ئێمە چووینە ناو سەردەمێکەوە کە کولتووری توندوتیژی دژ بە ژنان بە هەموو ماناکانیەوە گەیشتووەتە ئاستی "کوشتنی ژن" و باشترین بەڵگەش ئەوەیە کە لەم دواییانەدا لە ئێران ڕوویدا، لە ئەشکەنجەدان و کوشتنی ژنێکی گەنجی کورد بە ناوی ژینا ئەمینی.

 

ئێمە پشتیوانی لە شۆڕشی ئێران بە ڕێبەرایەتی ژنان دەکەین و پشتیوانی لە کەمپەینی "من ژیانم" دەکەین کە لەم دواییانەدا لە لایەن ڕێکخراو و تۆڕە پێشەنگەکانی فێمینیستەوە دەستیپێکردووە، تا شەڕ نەوەستێت و ئاسایش و ئارامی لەم ناوچە دێرینەی ئێمەدا جێگیر نەکرێت، بە بەردەوامی تێکۆشانمان زیاتر دەکەین. ئێمە لە ژێر ئەو دروشمەدا کە لەم دواییانەدا لە شۆڕشی ژنانی ئێراندا سەرنجی ڕاکێشا و لە ناوچەکە و جیهاندا دەنگی دایەوە، واتە دروشمی 'ژن، ژیان، ئازادی'، پابەندبوون بە تێکۆشانی خۆمان دووپاتدەکەینەوە.