ناوەندی هەواڵ

 

بەپێی ڕاپۆرتە بڵاوکراوەکان، لە سزایەکی لقی سێی دادگای تاوانەکانی شاری مەهاباد، گوڵاڵە مورادی بە تۆمەتی "هاوکاری لە کوشتنی ئەندامێکی سپای پاسدارانی ئیسلامی لە پیرانشار" بە ١٠ ساڵ و یەک ڕۆژ زیندان سزا درا، پاشان سزاکە بۆ ٤ ساڵ زیندانی بە ژماردنی ڕۆژانی دەستبەسەرکردنی پێشووی کەمکرایەوە.

 

جێی ئاماژەیە گوڵاڵە مورادی لە مانگی نیسانی ساڵی ڕابردوو لەگەڵ دوو منداڵەکەی دەستبەسەرکرا و بۆ لێپرسینەوە بۆ یەکێک لە ناوەندە ئەمنییەکانی ورمێ گوازرایەوە، دوای پڕۆسەی لێپرسینەوە کوڕەکانی بە ناوەکانی مەتین و تاهر بزازی ئازاد کران و گوڵاڵە مورادی لە مانگی حوزەیراندا ساڵی ڕابردوودا دوای تەواوبوونی پرۆسەی لێپرسینەوە لە ئیتلاعاتی سوپای ورمێ بۆ زیندانی شەهر گواسترایەوە.

 

ڕۆژی ٤ی ئایاری ئەمساڵ دوای یەک ساڵ و ٨ ڕۆژ لە دەستبەسەر کردنی، بە کەفالەتی ٤٠٠ ملیۆن تمەن و تا کۆتایی دانیشتنەکانی دادگا بە شێوەیەکی کاتی لە زیندانی ئۆرمیە ئازاد کرا.

 

شایانی باسە، گوڵاڵە مورادی لە کاتی دەستبەسەرکردنیدا چاوی بە هیچ پارێزەرێک نەکەوتووە و جگە لەوەش بۆ بەدەستهێنانی دانپێدانانی زۆرەملێ ئەشکەنجە دراوە.