ڕیحان تەمۆ: سیستم کێشەی ژینگە قووڵتر دەکاتەوە
ڕیحان تەمۆ، وتەبێژی لیژنەی ئیکۆلۆژی کۆنگرەی ستار، کاریگەری جەنگ و قەیرانەکانی لەسەر ئیکۆلۆژی و تێکچوونی سروشت هەڵسەنگاند و ئاماژەی بەوەدا کە کێشە ژینگەییەکان سەرچاوەکانیان سیستەمی مرۆڤ و دەوڵەتە.
ڕۆژ هۆزان
قامیشلۆ - شەڕ و ململانێکانی ئێستا، هەروەها ئەو قەیرانەی ئێستا تێیدا دەژین، نەک هەر بۆتە هۆی لەناوچوونی مرۆڤەکان، بەڵکو لە ناوچوونی سروشتیشیان لێکەوتووەتەوە، ڕۆژانە سروشتی کوردستان بەرەو کاولکاری دەچێت، ئەمە دەرئەنجامی هۆشیاری ئەو سیستەمە هەژموونانەیە کە ئێستا بە چەکی کیمیایی و شێوازی پیس دەستوەردان لە سروشت دەکەن.
ڕیحان تەمۆ، وتەبێژی لیژنەی ئیکۆلۆژیای کۆنگرەی ستار کاریگەریی جەنگ و قەیرانەکانی لەسەر ئیکۆلۆژی و تێکچوونی سروشت هەڵسەنگاند و ئاماژه‌ی به‌وه‌دا كه له‌م سه‌دەیە‌دا قه‌یرانی بنه‌ڕه‌تی له بواری سروشتدا هه‌یه، ئەمەش وایکردووە ژیانی خه‌ڵك بکەوێتە مه‌ترسیه‌وه و هۆكاری ئه‌و ناكۆكییانه ئه‌و تێڕوانینه‌یه كه هۆشیاری ده‌سه‌پێنرێت لەلایەن پیاو و دەوڵەتەوە.
وتیشی: بەهۆی ئەو گرژییەی لە شەڕەکانی زۆر ناوچەی وەک ڕۆژهەڵاتی ناوەڕاست و ئەوروپادا بەڕێوەدەچێت، چەندین شەڕی چەکداری دژی سروشت و مرۆڤەکان دەکرێت، ئەمەش هەڕەشە و سەختی زیاتری ژیان بەدوای خۆیدا دەهێنێت، بەهۆی ئەوەوە، ئەو ململانێیانەی کە پەیوەندییان بە جەنگەوە هەیە، ڕێگە بە گەشەکردنی قەیرانی ئیکۆلۆژی زیاتر دەدەن و وادەکات ژیانی مرۆڤ بەرەو مەترسی و وێرانکاری بڕوات.
"هێرشکردن بۆ سەر ژن و سروشت لەسەر بنەمای هەمان چەمکە"
ڕیحان تەمۆ سەرنجی بۆ دەستدرێژیکردنە سەر سروشت و ژینگە ڕاکێشا، ئاماژەی بەوەدا کە هێرشکردنە سەر ژنان هەمان هێرشکردنە سەر سروشتە، وتیشی: ئێستا شەڕی ئاو بە بڕینی ئاوی فورات هەڕەشە لە كۆمەڵگەكەمان دەكات، ئەمەش كارەساتی سروشتی دروستدەكات و ژیانی خەڵك دەخاتە مەترسییەوە، بەتایبەتی ئێستا كە ئەو نەخۆشییانە دەبینین كە لە ئەنجامی شەڕی سەر ناوچەكەمانەوە سەریان هەڵداوە، هه‌روه‌ها له چیاكانی كوردستان ڕۆژانه دار ده‌بڕدرێن، ئه‌مه‌ش به شه‌ڕێك له دژی سروشتی كوردستان پێناسه ده‌كه‌ین، هاوکات لەگەڵ بەکارهێنانی چەکی کیمیایی، کە ژیان و سروشتی مرۆڤ لەناودەبات،ڕەنگە ٪٢٠ی ئەم قەیرانانە کە باسی دەکەین سروشتی بن، بەڵام ٪٨٠یان دروستکراوی مرۆڤن.
بانگەواز بۆ پاراستنی ژینگە
ڕیحان تەمۆ داوای گرنگیدان بە ئیکۆلۆژی کرد و ڕایگەیاند، "کە پاراستنی ژینگە گرنگە و پێویستە لەوە تێبگەین کە لە چوارچێوەی پاراستنی ژینگەدا چەند دەتوانین ژینگە بپارێزین، بۆ ئەو شێوازە دەتوانین ژینگەکەمان بپارێزین بەتایبەتی لە ناوچەکانی باکوور و رۆژهەڵاتی سوریا، لەوێدا دەتوانین عەقڵ و کولتوورێکی ئیکۆلۆژی دروستبکەین، چونکە ئەگەر گۆڕانکاری لە عەقڵدا نەکەین، ناتوانین ئاگاداری خۆمان و ژینگە بین، پێویستە خۆمان لەو سیستەمە ڕزگار بکەین کە خراپیان فێرکردووین.