ناوەندی هەواڵ

 

بەڕێوەبەرایەتی ئاسایشی گەرمیان لە ڕاگەیەندراوێکدا ئاماژەی بەوەدا کە تۆمەتبارێکیان دەستگیرکردووە لە ڕێگەی فەیسبووکەوە هەڕەشەی لە ژنێکی گەنج کردووە.

 

بەپێی ڕاگەیەندراوەکە تۆمەتبار ناوی "ب. ح. ع"ە و لە ڕێگەی فەیسبوکەوە هەڕەشەی لە ژنێکی گەنج کردووە، پاشان سکاڵای لە دژ تۆمار کراوە و لەلایەن بەشی ئایتی بەڕێوەبەرایەت ئاسایشی گەرمیانەوە بە ماددەی (٢ـی خراپ بەکارهێنانی ئامێرە ئەلیکترۆنیەکان) دۆزراوەتەوە و دەستگیرکراوە.

 

هەر بە پێی ڕاگەیەندراوەکەی ئاسایشی گەرمیان پاش دەستگیرکردنی، ب. ح. ع دانی بە تاوانەکەیدا ناوە و لە ئێستادا بە فەرمانی دادوەر ڕاگیراوە.

 

تۆڕە کۆمەڵایەتییەکان و ناهۆشیاری لە بەکارهێنانیدا بووەتە هەڕەشە بۆ سەر ژیانی ژنانی گەنج، ئەگەرچی ئێستا جیهان لە پێشکەوتندایە، بەڵام بەهۆی ئەقڵیەتی پیاوسالاری و ڕەگەزگەرایی پیاوانەوە ڕۆژ نییە ژنان ڕووبەڕووی هەڕەشەی بڵاوکردنەوەی وێنە و ڤیدیۆکانیان نەبنەوە لەلایەن پیاوانەوە.