سلێمانی

 

ئەمڕۆ، ٢١ شوبات بەبۆنەی ڕۆژی جیهانی زمانی دایک، لە هۆڵی کۆنفرانسەکانی ڕێکخراوی گەشەپێدانی مەدەنیەت-CDO لە شاری سلێمانی، بە هاوبەشی خوێندکارانی بەشی دیبلۆماسی و پەیوەندییە گشتیەکانی زانکۆی گەشەپێدانی مرۆیی و هاوکاری ناوەندی پشتگیری مرۆیی و ڕێکخراوی یوس فۆکەس پانێڵێکیان بە ناونیشانی"زمانی دایک شوناسمانە" ڕێکخست.

 

لە پانێڵەکەدا پرۆفیسۆر شیلان عومەر، مامۆستای زمانی کوردی، ئاماژەی بەوەکرد، زمان بریتیە لە فەرهەنگی نەتەوەیەک و بابەتێکی سیاسییە، کوردیش بۆیە تا ئێستا نەبووە بە دەوڵەت چونکە لە کاتی پەیماننامەی لۆزاندا زمانی کوردی بوو، ئەگەر زمانێکی دیکەی هەبوایە ئێستا بەشێک بوو لە دەوڵەتانی ناوچەکە، لە ئێستادا پارێزگاری لە زمانی دایک ناکرێت و ئاستەنگیش دەخرێتە بەردەمی، دەبێت وەک شاعیرە دێرینەکان پارێزگاری لە فەرهەنگ و کولتووری زمانەکەمان بکەین، چونکە زمان واتە مێژوو و واتای بوونە، ئێمەی کورد ستەممان لە زمانی خۆمان کردووە بە  هێنانی زمانی بیانی.

 

 دواتر گوڵزار حەمەفەرەج شاعیر، بە پارچە شعرێک باسی لە گرنگی زمانی کوردی کرد و کۆتایی بە پانێڵەکە هات.

 

"پێویستە گەنجەکان گرنگی بە زمانی دایک بدەن"

هەستی عومەر، خوێندکاری زانکۆ، وتی: ئەمڕۆ کە ڕۆژی زمانی دایکە و هەموو گەلانی جیهان ئەم ڕۆژە بەرز ڕادەگرن، منیش وەکو گەنجێک هەست بە بەرپرسارێتی دەکەم بەرامبەر زمانەکەم و داوا لە گەنجان دەکەم بۆ پاراستنی زمانی دایک گرنگی بە فەرهەنگ و کلتور و زمانی کوردی بدەن".

 

٢١ی شوباتی هەمو ساڵێک بە ڕۆژی جیهانی زمانی دایک دیاریکراوە لەلایەن ڕێکخراوی نەتەوە یەکگرتووەکانەوە و هەموو گەلانی جیهان لەم ڕۆژەدا گرنگی بە زمانی دایک دەدەن، و زمانی کوردیش مێژوویەکی دێرینی هەیە و بۆ ماوەی چەندین نەوە سەرباری هەوڵەکانی داگیرکاری زمان و فەرهەنگی کوردی بەڵام پاڕێزگاری لێکراوە.