بۆ یەکەمجار ژنێکی سعودی کارتی پاڵاوتن بۆ ئۆڵۆمپیادی پاریس بەدەست دەهێنێت
دونیا ئەبو تالیب، یاریزانی سعودی، دوای سەرکەوتنەکەی لە کاتی پاڵاوتنەکانی ئاسیادا، بلیتی پاڵاوتنی ڕاستەوخۆی بۆ ئۆڵۆمپیادی پاریس ٢٠٢٤ بەدەستهێنا.
ناوەندی هەواڵ
دونیا ئەبو تالیب، یاریزانی هەڵبژاردەی سعودیە بلیتی پاڵاوتنی ڕاستەوخۆی بۆ یارییەکانی ئۆڵۆمپیادی پاریس ٢٠٢٤ بەدەستهێنا و بووە یەکەم ژنی سعودی کە کارتی پاڵاوتنی ڕاستەوخۆ بۆ یارییەکانی ئۆڵۆمپیاد بەدەستبهێنێت، ئەمەش دوای ئەوە دێت کە لە پاڵاوتنەکانی ئاسیا بۆ یارییەکانی ئۆڵۆمپیادی پاریس ٢٠٢٤ سەرکەوتوو بوو.
دوای هەوڵێکی بێشوماری دونیا لە هەموو یارییەکاندا، کارتی پاڵاوتنی بەدەستهێنا و بووە یەکێکی دیکە لەو دەستکەوتە بەنرخانەی بەدەستی هێناوە، وەک کاندیدبوونی بۆ مەدالیای برۆنزی لە ئاستی جیهانی و لە ئاسیا لە ماوەی ساڵانی ٢٠٢٢-٢٠٢٣.
دونیا ئەبو تالیب، تەمەنی ٢٧ ساڵە و یەکەم ژنی سعودییە کە مەدالیای ئاسیای لە یارییەکانی تایکواندۆدا بەدەستبهێنێت، لەڕێگەی بەشداریکردنی لە وەشانی کۆریای باشوور، لە تەمەنی ٨ ساڵییەوە دەستی بە ڕاهێنانی وەرزشە دڵخوازەکەی کردووە و توانی بەشداری لە یانەی گەنجان بکات لەگەڵ خوشکەکەیدا.
دوای ئەوەی تەمەنی گەیشتە ١٣ ساڵ، ڕێگری لە دونیا ئەبو تالیب کرا لە یانەی شەباب مەشق و ڕاهێنان بکات، بۆیە ڕاهێنەری براکەی ئەرکی مەشق و ڕاهێنانی لە ماڵەوە گرتە ئەستۆ، دوای ئەوە لە ساڵی ٢٠١٥ پەیوەندی بە فیدراسیۆنی تایکواندۆی سعودیەوە کرد و لە ماوەی کورتی ژیانی هونەریدا، دونیا ئەبو تالیب دەستکەوتی زۆری بەدەستهێنا، لە ساڵی ٢٠١٦دا توانی مەدالیای زێڕ لە پاڵەوانێتی ئەزموونی یانەکانی جیهانی لە ئوردن بەدەستبهێنێت.