ناوەندی هەواڵ

 

دوێنێ، ٦ی تشرینی دووەم، لە کاتژمێرەکانی پێشنیوەڕۆدا فڕۆکەیەکی بێ فڕۆکەوانی دەوڵەتی تورکیا لە گوندی بۆسکێنی سەر بە شاری ڕانیە لە هەرێمی ڕاپەڕین دوو هاوڵاتی کردە ئامانج و لە ئەنجامدا سێ کەس بریندار بوون.

 

ڕێکخراوی ژنانی ئازادی کوردستان-ڕژاک سەبارەت بە هێرشەکەی دوێنێ ڕاگەیەندراوێکی نووسراوی بڵاوکردەوە و تیایدا هاتووە؛ "پێویستە هەموو هاووڵاتیان و بەتایبەت ژنان و حزب و لایەنەکانی باشووری کوردستان هەڵوێستیان هەبێت بەرامبەر بەم داگیرکارییەی دەوڵەتی تورکیا، چونکە هەڵوێستی دژی داگیرکاری ئەرکێکی نیشتمانییە".

 

ڕژاک ئاماژەی بەوەدا، باشووری کوردستان ساڵانێکە لەژێر داگیرکاری دەوڵەتی داگیرکەری تورکیادایە، ئەم هێرش و هەڵسوکەوتانەی دوژمن تەنها زیانی مرۆیی و ماددی دەگەیەنێت، بەتایبەت لەم ساڵانەی دواییدا هێرشە ئاسمانییەکانی تورکیا لە زاخۆوە بۆ شەنگال، کۆیە، پێنجوێن و شارباژێر بەردەوامن و دوایین هێرش دوێنێ لە هەرێمی ڕاپەڕین بوو.

 

ڕژاک جەخت دەکاتەوە، هۆکاری هێرشەکانی دەوڵەتی داگیرکەری تورک بۆ ترساندنی خەڵک و دوورخستنەوەیانە لە بزووتنەوەی ئازادیخوازانەی گەل و زیانگەیاندنە بە یەکێتی نەتەوەیی، "بێدەنگی و بێ هەڵوێستی دەسەڵاتدارانی باشووری کوردستان لە بەرامبەر هێرش و کۆمەڵکوژییەکانی سەر گەلەکەمان و بێ هەڵوێستی گەلی باشووری کوردستانیش مایەی خەمبارییە، ئەم بێ هەڵوێستی و بێ دەنگییەی پارت و لایەنە کوردییەکان بەرامبەر داگیرکاران ساڵانێکە بەردەوامە و هۆکارێکە کە دوژمن بە ئاسانی ئامانجەکانی بپێکێت و بەردەوامی بە داگیرکارییەکانی بدات.

 

لە کۆتاییدا ڕژاک دەڵێت: وەک ڕژاک داوای پێکهێنانی هاوپەیمانی و بەرەیەکی دژ بە داگیرکەران دەکەین، کە لە هەموو حزب و لایەنەکانی باشووری کوردستان پێکبێت، چونکە هەڵوێستی دژی داگیرکاری ئەرکێکی نیشتمانییە، بۆئەوەی ڕێگری لە هێرشەکانی وەک دوێنێ بکرێت، پێویستە دروشمی "نا بۆ داگیرکاری" ببێتە هەوێنی یەکڕیزی و  پەیام و ڕاگەیەندراوەکان بکرێتە کرداری.