هەڵەبجە

 

پێشنیوەڕۆی ئەمڕۆ لە شاری هەڵەبجە یەکەم مەراسیمی نێودەوڵەتی بۆ ئاشتی بەناوی "تیدئێکس ئاشتی" بەڕێوەچوو، کە ١٠ کەسایەتی قسەکەر باسی ئەزموونی ژیانی خۆیان کرد و تەنها یەک ژن بە ناوی بێریڤان جەلال بەشداربوو.

 

بێریڤان جەلال، تاکە ژنە لەسەر شانۆی تیدئێکس باسی ئەزموونی ژیانی خۆی گێڕایەوە، بۆ نوژنها وتی: یەکەمجارە لە مەراسیمەکەدا بەشدارم و ئەزموونی ژیانی خۆم دەگێڕمەوە، داوا لە ژنان دەکەم، کۆڵ نەدەن و متمانەیان بە خۆیان هەبێت، یەقینیان بۆ سەرکەوتن هەبێت، هەر ئەمەش وای لە من کرد، ببم بە یاریزانی هەڵبژاردەی عێراق و چەندین نازناوی ناوخۆ و دەرەوەیی بەدەستبهێنم.

 

بێریڤان باس لەوەش دەکات کە ژنان توانایان هەیە بگەن بە خەون و ئامانجەکانیان و ڕۆژێک لەسەر شانۆی تیدئێکس سەرکەوتنەکانیان بنووسنەوە.

 

کەوسەر بەشیر وەک ڕێکخەر و خۆبەخشی تیدئێکس ئاشتی باسی لەوەکرد، "ئەمە یەکەمین چالاکی نێودەوڵەتییە لە هەڵەبجە ئەنجام دەدرێت، شارەکە خاوەنی چەندین کەسی بەتوانایە و ژیانی خۆیان لەگەڵ گەنجەکانمان هاوبەشی پێدەکەن، لەگەڵ ئەوەی یەک ژن بە ئەزموونەکانی بەشدارە، بەڵام لە باش بەڕێوەچوونی تیدئێکسەکەدا ڕۆڵی بەرچاویان هەیە و هیواخوازین لە داهاتوودا ژنانی زیاتر هەبن سەرکەوتنەکانیان باس بکەن.

 

پرژە بەهادین لە ستافی نەخۆشخانەی وێست ئای، کە یەکێكە لە سپۆنسەرەکانی مەراسیمەکە وتی: وەک تیمی ویست ئای ئامانجمانە هاوکار بین بۆ ئەوەی بیروڕای گەنجان بگەیەنینە سەرجەم ئەو گەنجانەی خوازیاری سەرکەوتنن.