ناوەندی هەواڵ

 

 ئەمڕۆ چوارشەممە ١٥ی ئازار، وتەبێژی ڕێکخراوی فریاکەوتنی ئێران ڕایگەیاند، لە ئەنجامی تەقینەوەی یارییە ئاگرینەکان لە کاتی ئاهەنگگێڕانی شەوی چوارشەممە سووردا ٢٧ کەس گیانیان لەدەستداوە و چوار هەزار و ٩٥ کەسی دیکەش برینداربوون بە توندی جیاواز.

 

موجتەبا خالیدی، وتەبێژی ڕێکخراوی فریاکەوتنی ئێران ڕایگەیاند، دوێنێ سێشەممە ١٤ی ئازار، لە میانی ڕێوڕەسمی ئاهەنگگێڕان بە شەوی چوارشەممە سوور، ١٩ کەس گیانیان لەدەستداوە و دوو هەزار و ٨١٧ کەسی دیکەش برینداربوون، ئاماژەی بەوەدا کە زۆربەی گیان لەدەستدانەکان لە پارێزگاکانی ئازەربایجانی ڕۆژهەڵات و قوم بووە و ٣٤ لە بریندارەکان گواستراونەتەوە بۆ یەکەی چاودێری چڕ.

 

هاوکات جەعفەر میعادفەر سەرۆکی ڕێکخراوەکە ڕایگەیاند کە ٩٢ لە بریندارەکان ئەندامەکانی جەستەیان بریندار بووە، ٤٧٠یان چاویان و ٥٤٠ کەسیش تووشی سووتان بوون بە ڕێژەی جیاواز.

 

لە هەمان کاتدا یەحیا تەباری بەرپرسی بەشی فریاکەوتنی تاران پشتڕاستی کردەوە کە دوایین ژمارەی بریندارانی پارێزگای تاران ڕۆژی چوارشەممە گەیشتووەتە ١٢ کوژراو و ٣٧٣ بریندار.

 

ئاهەنگی چوارشەممەی سوور هەموو ساڵێک دەبێتە هۆی گیانلەدەستدانی ژمارەیەک کەس و برینداربوونی کەسانی دیکە، لەئەنجامی تەقینەوەی تەقەمەنی و یارییە ئاگرینەکان، لەلایەکی دیکەوە  خاوی تیمەکانی فریاگوزاری و نەبوونی پێداویستی پێشکەوتوو و ئامێرەکان ژمارەی قوربانییەکان زیاد دەکەن.