‎ناوەندی هەواڵ

 

بڕیاربوو ئێوارەی ئەمڕۆ لە شەقامی سەهۆڵەکەی سلێمانی رێپێوانێک بۆ شەرمەزارکردنی پیلانگێڕی نێودەوڵەتی ١٥ی شوبات و ئازادیی جەستەیی رێبەری گەلی کورد عەبدوڵا ئۆجالان ئەنجام بدرێت، بەڵام لەلایەن ئاسایشەوە ڕێگریی لە ئەنجامدانی رێپێوانەکە کرا.

 

بەپێی زانیارییەکان، هەریەکە لە تارا حسێن و سەلام عەبدوڵا، هاوسەرۆکانی تەڤگەری ئازادیی کۆمەڵگەی کوردستان و زیاتر لە ٢٠ کەسی دیکە لەلایەن ئاسایشەوە دەستگیرکراون و تائێستاش ئازاد نەکراون.

 

لەوبارەیەوە رێکخراوی ژنانی ئازادی کوردستان-ڕژاک بەیاننامەیەکی بڵاوکردووەتەوە و لە سەرەتا باسی لە پیلانگێڕیی نێودەوڵەتیی ١٥ی شوبات کردووە و رایگەیاندووە: 
‎پیلانگێران بە بەدیلگرتنی رێبەر ئۆجەلان ویستیان ئیرادەی رادەست بکەن، بەڵام بە پێچەوانەوە بوو بە سمبولی بەرخۆدان و دروستکردنی سیستەمی کۆنفدرالیزمی دیموکراتی بۆ بەرقەراربوونی ئاشتی و پێکەوەژیان، بزووتنەوەی ئازادیش بە فیکر و رامانی رێبەر ئۆجەلان رۆژ لە دوای رۆژ لە گەورە بوون و بەرفراواندا دەبێت و لە ھەموو جیھان بڵاوببێتەوە.

         

ئەوەش هاتووە: 
‎ئەمڕۆ لە باکوور و رۆژئاوا و زۆربەی وڵاتانی جیھان ئازادیخوازان بۆ شکاندنی  گۆشەگیریی و بەدیهێنانی ئازادیی جەستەیی رێبەر ئۆجەلان لە شەقامن، ھەر ئەمڕۆش لە شاری سلێمانی بۆ شەرمەزارکردنی پیلانگێریی نێودەوڵەتی ئادیخوازان و ھاولاتیان چوونە سەر شەقام، بەڵام لەلایەن ئاسایش و دەسەڵاتدارانی ئەم ھەرێمە و لەسەر داوای میتی تورکیا دەستگیردەکرێن و دەخرێنە زیندان.

 

‎ رژاک دەڵێت: ئەم ھەڵوێستەی ئاسایش شەرمەزار دەکەین و داوا دەکەین ھەرچی زووە ئازادیخوازان ئازاد بکرێن.