ژوان کەرەمی

 

کرماشان- ئەمڕۆ، بەشێک لە خانەنشینانی دەستەبەری کۆمەڵایەتی،  لە بەردەم بینای ئیدارەی گشتیی دەستەبەری کۆمەڵایەتی لە شاری کرماشان لە ڕۆژهەڵاتی کوردستان گردبوونەوە و بە بەرزکردنەوەی دروشمەکانیان بۆ باشترکردنی بارودۆخی ژیان و پێدانی مووچەی خانەنشینانیان، ناڕەزایەتییان دەربڕی.

 

زیاتر لە 150 ژن و پیاوی کارمەندی خانەنشینی دەستەبەری کۆمەڵایەتی بەشدارییان لە گردبوونەوەکەدا کرد، کە لەلایەن هێزەکانی پۆلیس و ئەفسەران بە جلوبەرگی ئاساییەوە دەورە درابوون، ئەمەش لەکاتێکدابوو، بە نزیکبوونەوەی ساڵیادی شۆڕشی ژینا، ١٦ی ئەیلول، هێزی ئەمنی بێشوومار لە ناوچە کوردنشینەکان بڵاوکراونەتەوە.

 

لە گردبوونەوەکەدا یەکێک لە خانەنشینکراوەکان وتارێکی پێشکەشکرد و وتی: لە ماددەی نوێی مافی هاووڵاتیبووندا هاتووە، هاووڵاتیان مافی خۆیانە بە شێوەیەکی دروست کاروباری وڵات بەڕێوەببەن لەسەر بنەمای سەروەری یاسا، کارایی، لێپرسینەوە، شەفافیەت، دادپەروەری، و یەکسانی، ئایا ئێمە ئەو جۆرە مافانەمان بەدەست هێناوە؟ هەمان ئەو مافانەن کە پەسەندیان کردووە و بە شەرعییان زانیوە بۆ هاووڵاتیان؟، ئەگەر خانەنشینێک یان هەر هاوڵاتییەکی تر بیەوێت هاوار بکات بۆ مافەکانی، ئایا دەبێ ببرێت؟ ئایا پێویستە تۆمەتی بۆ بخەنە پاڵ؟ ئەمە چ جۆرە دادپەروەرییەکە؟"