ناوەندی هەواڵ

 

کاردانەوەکان بەرامبەر گیان لەدەستدانی ڕۆژنامەنووسان گوڵستان تاراو هێرۆ بەهادین کە دوێنێ لە بۆردومانی دەوڵەتی تورکدا کرانە ئامانج بەردەوامەو هەریەک لە بەرەی گەل و حزبی کۆمۆنیستی کرێکاریی کوردستان بەیاننامەیان بڵاوکردەوە.

 

دەقی بەیاننامەکەی بەرەی گەل:

بەرەی گەل بە توندی سەركۆنەی هێرشە تیرۆریستیەکەی ئەمڕۆی سەیدسادق دەکات کە تێیدا دوو هاونیشتیمانی ڕۆژنامەوان بەناوەکانی (گوڵستان تارا و هێرۆ بەهائەدین) کرانە ئامانج و تیرۆرکران.

 

بەرپرسیارێتی پاراستنی ژیان و سەلامەتی و سەروەری خاکی عێراق و هاوڵاتییەکانی لە ئەستۆی دەوڵەتی عێراق و دەسەڵاتدارانی هەريمی کوردستانە، بەداخەوە هەردولایان لە لوتکەی بێ باکی و بێ خەمیدان بەرامبەر ژیان و سەلامەتی و خوێنی هاوڵاتیانی کوردستان.

 

ئەوەی ڕوودەدات و هەر ڕۆژەو درۆنێک مرۆڤێکی سڤیل و بێ گوناهی ئێمە دەکاتە ئامانج بە هاوکاری دەستی ناوخۆییە و ئەجێندای سیاسییە، دووبارە بوونەوەی بەردەوامی ئەو خەرق و پێشێلکارییە ئەمنییانە شکستیی حکومڕانی دەسەڵاتدارانی هەرێمی کوردستانە و وای کردووە هیچ تاکێک هەست بە سەلامەتی و ئاسایشی ژیانی خۆی نەکات.

 

ئەجێندا دەرەکییەکان، کلکایەتی و دابەشبونە حزبی و شەخسیەکانی دەسەڵاتدارانی هەرێم هەموو سنورێکی بەزاندوە و دەبێت ئەو بێ باکیی و ئەجێندا مەترسیدارانە بەرامبەر ژیانی هاوڵاتیانمان کۆتایی پێبهێنرێت.

 

بەرەی گەل، لە کاتێکدا پرسە و سەرەخۆشی خۆی دەگەینێتە کەس و کاری ئەو دوو شەهیدە رۆژنامەوانە، بەرپرسیارێتی ژیان و سەلامەتی هاوڵاتیانی کوردستان دەخاتە ئەستۆی دەسەڵاتدارانی هەرێم و عێراق.

 

لای بەرەی گەل ژیان و سەلامەتی هاوڵاتیان هێڵی سورە و دەبێ ئەو بە ئامانجگرتن و تیرۆر و تۆقاندنە سنوری بۆ دابنرێ نەک هاوئاوازی لەگەڵدا بکرێت.

 

 

دەقى بەیاننامەی حزبی کۆمۆنیستی کرێکاری کوردستان:

تیرۆری ڕۆژنامەنووسان، هێرۆ بەهادین و گوڵستان تارا، بەتوندی سەرکۆنە دەکەین ! پێشنیوەڕۆی دوێنێ لە سەر ڕێگای شارۆچکەی سەید سادق، ئوتۆمۆبیلێک کە سێ ڕۆژنامەنووسی تێدا بوو، لەلایەن هێرشی بوردوومانی درۆنی تورکیاوە کرانە ئامانج و هەریەکە لەڕۆژنامەنووسان (هێرۆ بەهادین گوڵستان تارا ) ژیانیان لەدەستدا و ڕۆژنامەنووس ڕێبین بەکر بەسەختی بریندار دەکرێت. هەرسێ ڕۆژنامەنووس سەر بەکۆمپانیای چەتر بۆ کاری میدیایی لەهەرێمی کوردستان مۆڵەتی کارکردنی فەرمیان هەیە، کە بەڕێوە بوون وەک تیمیکی ڕۆژنامەنووسی بۆ ئەنجامدانی کارەکانیان و هیچ پەیوەندیەکیان بەکاری سیاسییەوە نەبووە.

 

ئەم هەنگاوەی دەوڵەتی فاشستی تورکیا لە درێژەی ئەو هێرش و ئۆپەراسیۆنە بەرفراوانە زەمینی و ئاسمانییەدایە کە ساڵانێکە بۆ نێو قوڵایی شار و گوندەکانی کوردستان دەستی داوەتێ و بەهۆیەوە ژیان و ئاسایشی خەڵکی کوردستانی نا ئارام و ناسەقامگیر کردووە و کوژران و برینداروبوون و ئاوارەبوونی دەیان هاوڵاتیی کوردستانی لێکەوتووەتەوە. ئەمە سەرباری بەردەوامی تیرۆرکردنی هەڵسوڕوانی سیاسی.

 

بەردەوامی ئەم پەلامارو هێرشە دڕندانەیەی دەوڵەتی فاشستی تورکیا، لە سایەی دەسەڵاتەکانی هەردوو حکومەتی عێراق و هەرێمدا، نەک هەر بێدەنگەی لێکراوە، بەڵکو زانیاری چەواشەکارانە لەسەر ئەم ڕوداوو دەستدرێژیانەی دەوڵەتی تورکیا لە میدیاکانی خۆیانەوە بڵاودەکەنەوە، هەتا ڕاستییەکانی پشتی سیاسەتی خۆش خزمەتی و ڕێکەوتنیان لەگەڵ حکومەتی فاسشتی تورکیادا، پێ دابپۆشن.

 

ئێمە، لە کۆمیتەی سلێمانی حزبی کۆمۆنیستی کرێکاریی کوردستان، سەرەڕای ئەوەی بەتوندی سەرکۆنەی ئەم کردەوە تیرۆریستی و ئینسان کوژیەی دەوڵەتی فاشیتی تورکیا دەکەین، هاوکات پرسە و سەرەخۆشی خۆمان بۆ کەسووکاری هەردوو ڕۆژنامەنووس هیرۆ بەهادین و گوڵستان تارا، دەردەبڕین وهیوای چاکبوونەوە بۆ بریندارەکانیش دەخوازین.

 

کۆمیتەی سلێمانی حزبی کۆمۆنیستی کرێکاریی کوردستان لەگەڵ ئەوەدا کە ئەم کردەوە تیرۆریستیەی تورکیا پێچەوانە بەیاساو ڕیساکانی جیهانی دەزانێت، هاوکات بەرپرسیارێتی ئەم تاوانە و سەلامەتی ڕۆژنامەنووسان دەخاتە ئەستۆی دەسەڵاتدارانی هەرێم و داواش لە ئازادیخوازان و ڕێکخراوەکانی بەرگریکار لەکاری ڕۆژنامەنووسی و ڕێکخراوە مرۆڤ دۆستەکان دەکات کە لەئاستی ئەم تاوانانەی دەوڵەتی تورکیاو ئەو بێدەنگییەی کە هەردوو حکومەتی هەرێم وعێراق گرتویانەتە بەر، بێدەنگ نەبن و بەشێوەی گونجاوی خۆیان ناڕەزایەتی دەرببرن.