ناوەندی هەواڵ

 

دەستبەسەرکردنی نهێنی مەهسا زارعی، ڕەنگدانەوەی بەردەوامی فشارەکانی بەردەم چالاکوانی ژنان و مافی مرۆڤە لە ئێران، بەتایبەتی ئەوانەی داوای ئازادیی مەدەنیی زیاتر دەکەن.

 

ڕۆژی ١ی حوزەیران، کاربەدەستانی ئێران، مەهسا زارعی، چالاکوانی مەدەنی و مافی ژنان کە بنکەکەی لە شاری کرماشانی ڕۆژهەڵاتی کوردستانە، پاش ٧ ڕۆژ دەستبەسەری بە دانانی گەرەنتی لە زیندان ئازاد کرد.

 

مەحسا زارعی دوای ئەوەی هێزە ئاسایشییەکانی سەر بە بەڕێوەبەرایەتی سەر بە دەزگای هەواڵگری هەڵیانکوتایە سەر ماڵی بنەماڵەکەی، بۆ شوێنێکی نادیار گواسترایەوە. دەستگیرکردنی ئەو ژنە ترس و دڵەڕاوکێی لەنێو خێزانەکەیدا دروستکرد. تا ئامادەکردنی ئەم هەواڵە هیچ زانیارییەک سەبارەت بە هۆکاری دەستگیرکردنی یان ئەو تۆمەتانەی کە ئاراستەی کراوە، بڵاونەکراوەتەوە.

 

مەهسا زارعی تەمەن ٣٣ ساڵ، لە ساڵانی ڕابردوودا چەندین جار لەلایەن هێزە ئاسایشییەکانەوە بانگهێشت و لێکۆڵینەوەی لەگەڵ کراوە، لە جەژنی نەورۆزدا کە دەکەوێتە ٢١ی ئادار، فشارێکی تایبەتی لەسەر بووە.