کۆیە

 

وەرزی هاوینی ئەمساڵ بەشی چالاكی قوتابخانەكانی پەروەردەی كۆیە خولی هاوینەی بۆ بوارەکانی شێوەكاری، میوزیک، شانۆ، خەت خۆشی، هۆنراوە، پەخشان و كاری دەستی لە سەنتەری گەنجانی کۆیە کردەوە و نزیکەی ٢٠٠ خوێندکار بەشدارییان تیادا کرد، ماوەی خولەکە دوو مانگی خایاند و لە کۆتا ڕۆژیشدا بە فێستیڤاڵێکی هونەری بەرهەمی بەشداربووان نمایشکرا.

 

دنیا شێروان، مامۆستای بەشی شێوەكاری لە بارەی چالاكیەكانیان وتی: یەكەم ساڵە خولەكانمان بەم شێوە جۆراوجۆر بن و فێستیڤاڵی بۆ ساز بدەین، گرنگی ئەو خولانە لەوەدایە منداڵان دووربخرێنەوە لە تەكنەلۆژیا و فێری لێهاتوویەك ببن، هەروەها فێردەبن ئەو شتانەی لەناو ماڵەوە بە كەڵك نایەت، دووبارە سودی لێببیننەوە و بەكاری بهێننەوە، هاوكات ئەو شتانەی گەر لێرە فێربوون لە داهاتوش دەتوانن سودی لێببینن.

 

ئەومامۆستایە هیواخوازە كە دایك و باوکان گرنگی بە منداڵەكانیان بدەن و هەوڵبدەن لە ئێستاوە لێهاتوویەكانیان نمایش بكەن، دەشڵێت: منداڵ زوو شت فێر دەبێت، دەتوانێت ئەو شتانەی ئێستا فێر دەبێت لە داهاتوودا بۆی ببێتە سەرچاوەی كار و داهات.