شیا كۆیی

 

کۆیە- سێیەمین فێستیڤاڵی هەنجیر لە شارەدێی تەقتەقی سەربە شارۆچکەی کۆیە بە بەشداری زیاتر لە ٥٠ ژن بە كاری جۆراوجۆر و ٨٠ جووتیار بە بەرهەمی خۆماڵیی بەڕێوەچوو، کە ئامانجی هاندانی گەشتیاری و ئاشناکردنی سەردانکەرانە بە بەرهەمە کشتوکاڵیەکان.

 

‎ئامانجی فێستیڤاڵەکە پاڵپشتی و پێشخستنی بەرهەمە ناوخۆییەکان بوو لەسەر ئاستێکی بەرفراوان، بەرزکردنەوەی متمانەی بەکاربەران بە بەرهەمە خۆماڵییەکان و پاڵپشتیكردنی جووتیارانی دەڤەرەكەیە، هاوكات تیشک خستنە سەر ئەو گەڕانەوەی ئابوورییەیە، کە لەلایەن کەرتی کشتوکاڵەوە پێشکەش دەکرێت، هاندانی خاوەن کێڵگەکانیشە لە ڕێگەی کردنەوەی ئاسۆی نوێ و داهێنەرانەی بازاڕکردن بۆ بەرهەمەکانیان.

 

ژنان پێشەنگی فێستیڤاڵەکانن

ڕووناك محەمەد، یەكێك لەو ژنانەیە لە سلێمانیەوە هاتووە بۆ فێستیڤاڵەكە و بەجلوبەرگی ژنانەی كوردییەوە بەشداریی كردووە، ئەو بۆ نوژنها وتی: ئەوە سێیەم ساڵە بەشداری فێستیڤاڵ دەكەم، بە جلوبەرگ و كڵاو و کەرەستەی كەلەپووری و كوردەوارییەوە، جگە لەمانە ئیشی خوری و چنینیش دەكەم، بەڵام بەهۆی گەرماوە نمایشم نەكردووە.

 

وتیشی: زۆر خۆشحاڵین بەو بەشداریكردنە لە فێستیڤاڵەكە، ئێمە وەك سەفرەو گەشت بەشداری لەو جۆرە فێستیڤاڵانە دەكەین و بە ماڵەوە دێین و لێرە گەشتوگوزاری كۆیە شوێنی مانەوەیان بۆ دابینكردووین و زۆر ئاسانكارییمان بۆ كراوە.

 

لیمۆ نادر لە ناوچەی شوانەوە بە بەرهەمەكانی رەز و باخی خۆیان بەشداری كردووە و دەڵێت: بەرهەمەكانم هەمووی سروشتی و هی ماڵی خۆمە، وەك هەنجیری وشك و تازە و و گەڵامێو، بەشداریم كردووە لەو فێستیڤاڵە و فێستیڤاڵێكی زۆر خۆشە ئەوەش لە سەرووی هەموویەتی.

 

وتیشی: ئەمرۆ زیاتر هەنجیری وشكم فرۆشتووە، بە بەراورد بە هەنجیری تازە، چونكە هەنجیرەكەی من سروشتییە و جوانە، شەكراوم لێنەداوە، دەشمەوێت ژنان فێر بكەم چۆن لەم وەرزە هەنجیر وشك بكەنەوە.

 

بەپێی  وتەی بەڕێوەبەری شارەدێی تەقتەق نزیكەی ١٠ هەزار گەشتیار سەردانی فێستیڤاڵەكەیان كردووە و سەردانیکەرانی فێستیڤاڵەکە چێژیان لە کەشێکی خێزانیی پڕ لە خۆشی و کات بەسەربردن و چالاکییەکان وەرگرت.