ناوەندی هەواڵ

 

لە درێژەی شەپۆلی لەسێدارەدانی زیندانیان لە ئێران، شەوی ڕابردوو ئازادیخوازانی شارەکانی ئێران و کوردستان لە دژی سزای سێدارەی ڕژێمی ئیسلامی ئێران هاتنە سەر شەقامەکان.

 

خۆپیشاندەران لە مهاباد، سنە، کرماشان، ئیلام، ئەبدانان، تاران، ئەسفەهان، ئەسفراین و چەند شاری دیکە بەربەستیان دروستکرد، ئاگریان بەردایە بارەگاکانی بەسیجی و سوپا و لافیتەی حکومەت و دروشمەکانی "مەرگ بۆ کۆماری سێدارە، ڕاپەڕین بەردەوامە، لە کوردستان تا تاران گیانم فیدای ئێران، مەرگ بۆ ڕژێمی خەڵک کوژ" وترانەوە و جەخت لەسەر بەردەوامیی ناڕەزایەتییەکان تا سەرکەوتن و ڕووخاندنی ڕژێمی ئێران کرایەوە.

 

ناڕازییان و چالاکوانانی سیاسی و مەدەنی، بە بڵاوکردنەوەی بانگەواز و بڵاوکراوە و بەیاننامەی جۆراوجۆر، بە مەبەستی ڕاگرتنی هەڵمەتی سێدارەی ڕژێمی ئیسلامی ئێران لە ڕێگەی یەکگرتوویی و  هەنگاونان بەرەو دیموکراسی، خوازیاری ئامادەبوونی بەربڵاوی هاووڵاتییان لە شەقامەکان بوون.

 

لەلایەکی دیکەوە، ئەمڕۆ، ٢١ی ئایار کۆمەڵێک لە سینەماکارانی ئێرانی بەشدارییان لە فەرشی سووری فێستیڤاڵی فیلمی کان کرد و ناڕەزایەتیان دژی سزای سێدارە دەربڕی، بەتایبەت لە سێدارەدانی ٣ خۆپیشاندەری شۆڕشی "ژن، ژیان، ئازادی"

 

ئەم هونەرمەندانە بە هەڵگرتنی وێنەی خۆپیشاندەرانی زیندانیکراو و لەسێدارەدراو، پشتیوانی خۆیان بۆ ڕاپەڕینی شۆڕشگێڕی ئێران ڕاگەیاند و بە توندی ئیدانەی سێدارەیان کرد، تیری فرمۆ، بەڕێوەبەری فێستیڤاڵەکە، بەشداری ناڕەزایەتییەکە بوو و پشتیوانی لە ناڕەزایەتییە سەرتاسەرییەکانی خەڵکی ئێران لە دژی ڕژێم کرد.