سلێمانی

 

ئەمڕۆ، ١٥ی شوبات ٢٤ ساڵ تێدەپەڕێت بەسەر گەورەترین پیلانگێڕی نێودەوڵەتی لە مێژوودا، کە دژی ڕێبەری گەلی كورد، عەبدوڵا ئۆجالان ئەنجامدرا، ئەو پیلانگێڕییە لە ٩ی تشرینی یەكەمی ساڵی ١٩٩٨ دەستیپێكرد و لە ١٥ی شووباتی ١٩٩٩ بە ڕفاندنی ڕێبەر عەبدوڵا ئۆجالان لە كینیا و ڕادەستكردنەوەی بە توركیا كۆتاییپێهات، لەو ڕۆژەوە تا ئەمڕۆ، ڕێبەری گەلی كورد لە زیندانی ئیمراڵیدا گۆشەگیرکراوە و هەموو مافێکیان لێ زەوتکراوە.

 

بەو بۆنەیەوە لە ١٥ی شوباتدا لە کوردستان و وڵاتانی ئەوروپادا کوردان و ئازادیخوازان بە چالاکی مانگرتن، ڕێپێوان، کۆنفرانس و سیمینار و گردبوونەوە پیلانگێڕی نێودەوڵەتی شەرمەزار دەکەن.

 

ئەمڕۆش لە شاری سلێمانی، لە چوارچێوەی زنجیرە چالاکییەکانی شەرمەزارکردنی پیلانگێڕی نێودەوڵەتی سەر ڕێبەری گەلی کورد، عەبدولا ئۆجالان، بە دەستپێشخەری کۆمیتەی ئازادی ئۆجالان و بە هەماهەنگی لەگەڵ تەڤگەری ئازادی کۆمەڵگەی کوردستان، ڕێکخراوی ژنانی ئازادی کوردستان-ڕژاک، کۆمەڵەی گەنجانی وڵاتپارێز و بە بەبەشداری ژمارەیەک چالاکوان و لایەنی سیاسی و ئازادیخوازان ڕێپێوانێک بەڕێوەچوو.

 

ڕێپێوانەکە بە دروشمی "ئیدی بەسە سیستمی زیندانی و گۆشەگیری ئیمڕالی" و "دەستبەجێ ئازادی بۆ ڕێبەر عەبدوڵا ئۆجالان" لە شەقامی سالم سەهۆڵەکەی شاری سلێمانی بەرەو باخی گشتی دەستیپێکرد و دروشمی "بێ سەرۆک ژیان نابێ، کات کاتی ئازادییە، بمرێ خیانەت" وترایەوە.

 

لە کۆتایی ڕێپێوانەکەدا کۆنگرەیەکی ڕۆژنامەنووسی بەسرا و تێیدا محەمەد بەکر، ئەندامی کۆمیتەی ئازادی ئۆجالان وتارێکی پێشکەشکرد و وتی: ٢٥ ساڵە ڕێبەری گەلی کورد، عەبدوڵا ئۆجالان لە زینداندا گۆشەگیر دەکرێت، ئەم پیلانگێڕییە نێودەوڵەتییە بە هاوکاری دەوڵەتی تورکیا و وڵاتانی ناتۆ ئەنجامدرا، بەڵام بەرخۆدانی مێژووی و پێکەوەیی بەڕێز ئۆجالان و گەلی کورد و بزوتنەوە ڕزگاریخوازەکەی، ئەڵقەی یەکەمی پیلانگێڕییەکەی پوچەڵکردەوە و لەم ٢٤ ساڵەی ڕابردوودا پێداگری خۆیان لەسەر بەرخۆدان و شۆڕشی ئازادیی و گەیشتن بە ماف و ئازادییەکان دووپاتکردەوە.

 

تارا حسێن، هاوسەرۆکی تەڤگەری ئازادی کۆمەڵگەی کوردستان وتارێکی پێشکەشکرد و ئاماژەی بەوەدا، پیلانگێڕی نێودەوڵەتی سەر ڕێبەری گەلی کورد، عەبدوڵا ئۆجالان، پیلانگێڕی بوو لە دژی گەلی کورد، چونکە ڕێبەر ئۆجالان تێکۆشانی بۆ گەلی کورد و ڕۆژهەڵاتی ناوەراست دەکرد، دەوڵەتان دەیانزانی ڕێبەر ئۆجالان مەترسییە بۆ سیستەمەکەی ئەوان، بۆیە دەستگیریان کرد، چونکە ئازادی ڕێبەر ئۆجالان ئازادی و ئاشتی و سەقامگیری ناوچەکە و ڕۆژهەڵاتی ناوەڕاستە.

 

بانوو هەڵەبجەیی، ئەندامی ڕێکخراوی ژنانی ئازادی کوردستان-ڕژاک وتارێکی پێشکەشکرد و ئاماژەی بەوەدا، "دەوڵەتانی داگیرکار و زلهێز وایانزانی بە دەستگیرکردنی ڕێبەر ئۆجالان ئیدی تێکۆشانەکەی لەناو دەچێت، چونکە لە پێشتر و شۆڕشە جیاوازەکاندا، کاتێک سەرکردەکان دەستگیردەکران ئاشبەتاڵ ڕادەگەیەنرا، بەڵام ڕێبەر ئۆجالان و ئایدۆلۆژیاکەی گەلیان زیاتر سورکرد لەسەر بەرخۆدان و تێکۆشان لەپێناو ئازادی ژن و گەلی کورددا.

 

هەر لە درێژەی چالاکییەکەدا وتاری حزبی شیوعی کوردستان و حزبی کۆمۆنیستی کوردستان خوێندرایەوە و بە وتنەوەی دروشمی "بێ سەرۆک ژیان نابێ" "بژی ڕێبەر ئاپۆ" کۆتاییان بە چالاکییەکە هێنا.