ناوەندی هەواڵ

 

دەوڵەتی تورکیا شەوی ڕابردوو، ١٧ی نیسان بە چڕی هێرشی زەمینی بۆ سەر چیای کوڕەژارۆ لە ئامێدی دەستپێکردووە، لە ١٥ی مانگیشەوە لە ڕێگەی فڕۆکەوە بۆردومانی ناوچەکانی شێلادزێ، دێرەلوک و ئامێدی دەکات، تیمی کوردستانی عێراقی ڕێکخراوی سی پی تی ڕاگەیاندراوێکی لەو بارەیەوە بڵاوکردەوە و داوادەکات کە دەستبەجێ دەوڵەتی تورکیا هێرشەکانی ڕابگرێت.

 

ڕاگەیەندراوەکەی سی پی تی بەم شێوەیەیە: "دوێنێ شەو، سوپای توركیا ئۆپەراسیۆنێكی سەربازی نوێی لە ژێر ناوی چنگی-قفڵ لە ناوچەكانی ئاڤاشین، زاپ و مەتینا لە قەزای ئامێدی لە پارێزگای دھۆك لە ھەرێمی كوردستان، ڕاگەیاند.

بەر لە دەستپێكردنی ئۆپەراسیۆنەكە، ھێزی ئاسمانی توركیا نزیكەی ٥٠ جار گوندەكانی دەوروبەری شیلادزێ، دێرەلوك و كانی ماسێ'یان بۆردوومانكرد و بەدەیان سەربازی توركیش لە ھەلیكۆپتەرەوە بۆ سەر چیاكانی دەڤەری نێروە و ڕێكان دابەزێنرانە خوارەوە.

تیمی كوردستانی عێراقی CPT، داوا لە سوپای توركیا دەكات كە دەستبەجێ بۆردوومانەكانی بۆ سەر ھەرێمی كوردستان ڕابگرێت و چیتر ژیانی ھاوڵاتیانی مەدەنی نەخرێتە مەترسیەوە".

 

لەگەڵ راگەیەندراوەکەشدا سی پی تی ڤیدیۆی ناو شارۆچکەی شیلادزێیان بڵاوکردووەتەوە کە دەنگی تەقە و بۆردومانی تێدا دەبیسترێت.