ناوەندی هەواڵ

 

بەپێی لێکۆڵینەوەی جیۆلۆجی ئەمریکا "USGS" دوێنێ ٧ی تشرینی یەکەم کاتژێمر ١١:٠٠ بوومەلەرزە لە پارێزگای هەرات لە ڕۆژئاوای ئەفغانستان لە سنووری ئێران ڕوویدا بە گوڕی ٦.٣, ٥.٥, ٤.٧, ٦.٣, ٥.٩, ٤.٦ و دواتر بە گوڕی ٤.٩ ڕوویاندا.

 

نەتەوەیەکگرتووەکان ئاماژەی بەوەکرد، دوو هەزارو ٥٣ کەس گیانیان لەدەستداوەو ٩ هەزارو ٢٤٠ کەسیش برینداربوون، سەرچاوە ناوخۆییەکان پێشتر ڕایانگەیاندبوو کە ژمارەی گیان لەدەستدان ١٢٠ کەس بووە و ژمارەی بێسەروشوێنەکانیش زیاتر لە هەزار کەس بووە.

 

هەزاران کەس لەژێر داروپەردوودان      

ڕاپۆرتەکان ئاماژەیان بەوەکردووە، ژمارەیەکی زۆر لە بیناکانی پارێزگاکە وێران بوون کە نزیکەی ١.٩  ملیۆن کەس تێیدا دەژین و هەندێکیش لەژێر داروپەردووەکاندا جێهێڵدراون، هەروەها ٧ گوند زیانی گەورەیان بەرکەوتووە، نزیکەی هەزارو ٢٠٠ خێزان هێشتا لەژێر داروپەردوودان و هەوڵەکانی گەڕان و ڕزگارکردن لەو ناوچانە بەردەوامن کە بەهۆی بوومەلەرزەکەوە زیانیان بەرکەوتووە.

 

هیچ هاوکارییەک بە زیانلیکەوتووانی بوومەلەرزەکە نەگەیشتووە

لە لایەکی دیکەوە، ڕاپۆرتەکان ئاشکرایان کرد، هیچ هاوکارییەک لە دەزگاکانی فریاگوزاری و تاڵیبانەوە بۆ قوربانیانی بوومەلەرزەکە وەرنەگیراوە کە ماڵەکانیان وێران بوون، دوای بوومەلەرزەکە تاڵیبان داوای هاوکاری لە وڵاتان کردووە بۆ یارمەتیدان.