ناوەندی هەواڵ

 

داواکاری کۆمیسیۆنی باڵای نەتەوە یەکگرتووەکان بۆ پەنابەرانی کۆمەڵگەی نێودەوڵەتی بۆ نوێکردنەوەی پابەندبوونی خۆی بۆ دابینکردنی بودجە بۆ وەڵامدانەوەی مرۆیی و پێشکەشکردنی پشتیوانی سیاسی بۆ دۆزینەوەی چارەسەرێک بۆ نزیکەی یەک ملیۆن پەنابەری ڕۆهینگیا لە بەنگلادیش، خستەڕوو.

 

ماڵپەڕی فەرمی نەتەوە یەکگرتووەکان دوێنێ سێشەممە ٢٢ی ئاب ئاشکرای کرد، شەش ساڵە بەسەر کۆچبەربوونی زیاتر لە ٧٠٠ هەزار ژن و پیاو و منداڵ لە میانمارەوە بۆ بەنگلادیش تێپەڕ دەبێت.

 

کۆمیسیۆنەکە جەختی لەوە کردەوە، کە دۆخی مرۆیی پەنابەران بەرەو خراپتر دەچێت، ئاڵنگارییەکانی دەوروبەری ئەم قەیرانە درێژخایەنە لە زیادبووندایە، چونکە کەمبوونەوەی بودجە دەسەڵاتی مرۆیی ناچار دەکات، کە سەرنجیان تەنها لەسەر گرنگترین پێداویستییە مرۆییەکان بێت.

 

کۆمیسیۆنەکە ڕایگەیاندووە، گەڕانەوەی پەنابەران بۆ میانمار هێشتا چارەسەری سەرەکی ئەم قەیرانەیە، زۆرێک لە پەنابەرانی ڕۆهینگیا پشتڕاستیان کردووەتەوە کە دەیانەوێت بگەڕێنەوە بۆ میانمار، بەڵام کاتێک دۆخەکە سەلامەت بێت بۆیان، بۆیە کۆمەڵگەی نێودەوڵەتی دەبێت هەوڵەکانی نوێ بکاتەوە بۆ ئەوەی ئەمە ببێتە ڕاستی.

 

ئاماژە بەوەشکراوە، سەرەڕای بوونی نزیکەی ملیۆنێک پەنابەر لەناو سنوورەکاندا، بەنگلادیش پابەندبوونە مرۆییەکانی نیشانداوە کە دەبێت لەڕێگەی وەبەرهێنانی بەردەوامی خۆیەوە لە هەموو پەنابەران و کۆمەڵگاکانی میوانداردا دانیان پێدا بنرێت.

 

شایانی باسە، ئەو ئاوارەبوونە لە میانمارەوە دوای لەسێدارەدانی بەکۆمەڵی خەڵکی سڤیل و سووتاندنی ماڵ و باڵەخانەکان بە قەبارەیەکی بەرفراوان و بە ئەنقەست لەلایەن هێزە ئەمنییەکانەوە هات، کە لەلایەن ڕێکخراوەکانی مافی مرۆڤەوە بە "هەڵمەتی پاکتاوی نەتەوەیی" پێناسە کرا. کە ڕۆهینگیاکان کە زۆرترین گۆشەگیرییان لەسەرە لە جیهاندا، تووشی توندوتیژی و کوشتن و ئەشکەنجەدان بوون و بە زۆر دیپۆرتکرانەوە.