ناوەندی هەواڵ

 

لە دوکانێکی دروومان لە شاری هەولێر بە هۆی دانانی کامێرا لە شوێنی خۆگۆڕینی ژنان، بەرگدروویەک لە لایەن پۆلیسی هەولێرەوە دەستگیر دەکرێت بە ناوی (ع.س) تەمەنی ٣٧ ساڵ، خێزاندارە و منداڵی هەیە، ع.س پەنابەرە و ماوەی ١٠ ساڵە لە هەرێمی کوردستان و شاری هەولێر دەژی.

لە کاتی سەردانیکردنی ژنێکی بە ڕەگەز عەرەبی ٢٥ سال بۆ دوکانی دروومانەکە و چوونە ژووری خۆگۆڕین بە مەبەستی پراوەکردنی ئەو پۆشاکەی بۆی دووریوە، دەبینێت مۆبایلی بەرگدرووەکە ڤیدیۆی شوێنی خۆگۆڕینەکە دەگوازێتەوە، دوای درک پێکردنی ڕاستەوخۆ مۆبایلەکە لە خاوەن دوکانەکە دەسەنێت و دەیبات بۆ نزیکترین بنکەی پۆلیسی ئەو ناوچەیە.

دوای ئاگادارکردنەوەی پۆلیس بە پێی ماددەی ٤٠٢ لە یاسای سزادانی عێراقی خاوەن دوکانەکە بەندکراوە و لێکۆڵینەوەی لەگەڵ دەکرێت، هەروەها پۆلیسی هەولێر داوا لە ژنان دەکات لەکاتی سەردانیکردنیان بۆ دووکانی جلوبەرگ وریا بن و ئاگاداری کامێرای نهێنی و شاراوە ببن.

 

ت.پ