ناوەندی هەواڵ

 

بڕیارەکانی دادگا دژی ژنان لە ئێران ڕەخنەی بەربڵاوی لێکەوتەوە و ڕێکخراوەکانی مافی مرۆڤ بە پێشێلکردنی ئاشکرای مافەکانی ژنان و ئازادی ڕادەربڕینیان لە پێنوس دەدەن، بە تایبەت بە لەبەرچاوگرتنی زیادبوونی ژمارەی دەستبەسەرکردن و دادگاییکردنی توند کە ژنانی چالاکوان و نەیارانی ڕژێم دەکەنە ئامانج.

 

ماڵپەڕی "دەنگی دەستبەسەرکراوانی کورد و ئێرانی" ڕۆژی ٢٩ی تشرینی دووەم بڵاویکردەوە، دەسەڵاتدارانی ئێران سزای سێ ساڵ زیندانیان بەسەر شیدا عەزیزی، ژنێکی گەنجی کوردی هاوڵاتی سنە لە ڕۆژهەڵاتی کوردستان سەپاندووە.

 

ئەم بڕیارە کە لە لایەن لقی ١ی دادگای ئینقلاب لە شاری سنە دەرچووە، دوای دەستبەسەر کردنی لە کاتی هێرشەکانی ئیسرائیل بۆ سەر ئێران هاتووە، ئەو ژنە گەنجە بە "هەوڵدان بۆ تێکدانی ئاسایشی نیشتمانی" تۆمەتبار کرا.

 

لە ڕاپۆرتەکەدا ئاماژە بەوە کراوە، کە شیدا عەزیزی لە کاتی شەڕی ١٢ ڕۆژەی نێوان ئێران و ئیسرائیل لە سنە دەستبەسەر و بەبێ فەرمانی دەستگیرکردن بۆ زیندان گوازراوەتەوە، هەروەها ماڵپەڕەکە زانیاری نوێی سەبارەت بە زیندانیکردنی دوو ژن لە زیندانەکانی سنە و ئێڤین ئاشکرا کردووە.

 

ئاماژە بەوەکراوە، زیندانیانی سیاسی مەرزیە فارسی و فوروغ تەقی پوور کە لە زیندانی ئێڤین دەستبەسەر کراون، بەهۆی ڕەتکردنەوەی چاودێری پزیشکی و زیادبوونی فشارە ئاسایشییەکانەوە بەدەست تێکچوونی باری تەندروستییەوە دەناڵێنن، لە ساڵی ٢٠٢٣، هاوکات لەگەڵ ساڵیادی شۆڕشی گەل لە ئێران، دەستبەسەر کراون، پێش ئەوەی بگوازرێنەوە بۆ زیندانی ئێڤین، دادوەرێک لە دادگای ئینقلابی تاران بە تۆمەتی "پەیوەندی لەگەڵ ئۆپۆزسیۆن دژ بە ڕژێمی ئێران" سزای ١٥ ساڵ زیندانی بۆ هەریەکێکیان سەپاندووە.