ناوەندی هەواڵ

 

ئەمڕۆ ٢٣ی تشرینی یەکەم، کۆنگرەى نەتەوەیی کوردستان "کەنەکە" لەبارەى بەکارهێنانى چەکى کیمایی لەلایەن دەوڵەتى داگیرکەرى تورک دژى گەریلا و هاوڵاتیانى مەدەنى لە بادینان، کۆنگرەیەکی ڕۆژنامەنووسیی لە هەولێر ئەنجامدا.

لە کۆنگرەکەدا ڕاگەیەندراوێک لەلایەن شوکروڵا حەمەئەمین، ئەندامى کەنەکەوە خوێندرایەوە، کە تێیدا هاتبوو، "دەوڵەتى داگیرکەرى تورک شەڕێکى ناڕەواى بەسەر گەلەکەماندا سەپاندووە لەو شەڕەشدا هەموو پێوانە ئەخلاقى و یاسایی بەزاندووە و تا ئاستى بەکارهێنانى چەکى کیمایی و کۆمەڵکوژیى قەدەغەکراو دژى گەلەکەمان و دەیەوێت بە سیاسەتى زەبر و زەنگ، دەنگى ئازادیخوازانەى گەلەکەمان کپ بکات، دەوڵەتى داگیرى تورک بەوە ناوەستێت، کە لە باکوورى کوردستان دژى مافەکانى گەلەکەمان بێت، بەڵکو ڕۆژانە هێرش و پەلامارەکانى بۆسەر ڕۆژئاوا و باشوورى کوردستان بەردەوامە، کە ئامانج تێیدا لەناوبردنى دەستکەوتەکانى گەلەکەمان و داگیرکردنى تەواوى خاکى کوردستانە."

 

ئاماژە بەوەشکراوە، "شەش مانگە دەوڵەتى داگیرکەرى تورک هێرشێکى بەرفراوانى بۆسەر ئاڤاشین و مەتینا و زاپ دەستپێکردووە، کە تا ئێستا بەهۆى بەرگریى و ئازایی و خۆڕاگریى گەریلاوە سەرکەوتنى بەدەست نەهێناوە.، ئەو دەوڵەتە داگیرکەرە بۆ شاردنەوەى شکستەکانى و گەیشتن بە ئامانجەکانى بەپێى ڕاگەیەندراوەکانى مەیدانى شەڕ و بڵاوکردنەوەى بەڵگەکان، تا ئێستا چەندین جار چەکى کیمایی و چەکى کۆمەڵکوژیى قەدەغەکراوى جەنگى دژى گەریلا بەکارهێناوە، کە بەهۆیانەوە نەک هەر گەریلا، بەڵکو هاوڵاتى مەدەنیش بوونەتە قوربانیی بەرکەوتەى ئەو چەکانە"

.

سەبارەت بە بێدەنگى وڵاتانى جیهان کەنەکە ڕایگەیاندوە، ئەوەى تا ئێستا هێز و بوێریى داوەتە دەوڵەتى داگیرکەرى تورک، کە سڵ لە کوشتن و کۆمەڵکوژکردنى گەلى کورد و شێواندنى سروشت و ژینگەیی کوردستان نەکاتەوە، بێدەنگیى کۆمەڵگەى نێودەوڵەتیى و ڕاى گشتیە، ئەگەر لە ئێستادا ڕێگرى لە سیاسەتى شەڕخوازى و تەماحکارانەى ئەردۆغان نەگیرێت دووبارە کارەساتى هاوشێوەى کیمابارانکردنى چەندین ناوچەى کوردستان لەلایەن ڕژێمى بەعسەوە دووبارە دەبێتەوە و چارەنوسى گەلەکەمان دەکەوێتە بەر مەترسى گەورە.

 

کەنەکە، داوا دەکات کە ڕای گشتى جیهانى و کۆمەڵگەى نێودەوڵەتى و کە چیتر لە پێناو بەرژەوەندییە ئابووریى و سیاسییەکانیان لەئاست ئەو تاوانە دژ بە مرۆڤانە چاو دانەخەن و تیمى تایبەت پێکبێت و بچنە ئەو ناوچانەى کە چەکى کیمایی تێدا بەکارهاتووە، تاوەکو بە چاوى خۆیان ڕاستییەکان ببینن، کە چۆن دەوڵەتى داگیرکەرى تورک چەکى قەدەغەکراوى بەکارهێناوە و لە هەمانکاتیشدا فشار لە ئەردۆغان بکەن و ناچارى بکەن، کە مل بۆ چارەسەرى ئاشتییانە بدات و کۆتایی بەم شەڕە ناڕەوایە بهێندرێت".

 

کەنەکە داوا لە دەوڵەتى عێراق و حکومەتى هەرێمى کوردستانیش دەکات، کە بەجدیى بێنە سەرهێڵ و چیتر ڕێگە نەدەن دەوڵەتى داگیرکەرى تورک بەمشێوەیە و بە ئارەزووى خۆى سەروەریی خاکى عێراق پێشێل بکات و خاکەکەى داگیربکات و هاوڵاتیانى ئاوارە بکات و ژینگەکەى بسوتێنێت.

 

لە کۆتایی ڕاگەیەندراوەکەی کەنەکەدا هاتووە، "داوا لەسەرجەم حزب و لایەنە سیاسی و ڕێکخراوەکانى کۆمەڵگەى مەدەنى و مامۆستایانى ئاینى و ڕۆشنبیران و ئازادیخوازان و تەواوى هاوڵاتیان دەکەین، کە بە ئەرکى نەتەوەیی و مرۆیی خۆیان هەڵسن و دژى هێرشەکانى دەوڵەتى داگیرکەرى تورک و ئەردۆغان بوەستنەوە".