ناوەندی هەواڵ

 

فەرماندەیی پۆلیسی کەرخی بەغداد سەبارەت بە هێرشکردنە سەر ژنێكی گەنج بە تێزاب و دەستگیرکردنى تاوانباران، ڕاگەیەندراوێکى بڵاوکردەوەو تێیدا هاتووە: دواى ئەوەى دوێنێ ژنێكی گەنج لە گەڕەکى حوڕییەى بەغداد لە ماڵ دێتە دەرەوە و سەر ئۆتۆمبیلەکەی دەكەوێت، چەند کەسێک لە ڕێگەى ماتۆڕسکیلەوە لە نزیک ئۆتۆمبێلەكەی دەوەستن و یەکێكیان دەرگاکە دەکاتەوە و تێزاب بە ژنە گەنجەكەدا دەکات.

 

ئاماژە بەوەشکراوە، هێزەکانى پۆلیس لە بنکەی پۆلیسی سەلام کە بەشێکە لە بەشی پۆلیسی حوڕییە، سێ تۆمەتباریان لە سەر ڕووداوەکە دەستگیرکردووە.

 

ئەوەش خراوەتەڕوو، تۆمەتبارەکان ڕەوانەی دەسەڵاتی دادوەرى کراون بۆ ئەوەی ڕێوشوێنی یاسایی پێویست لە دژیان بگیرێتەبەر.

 

جێگاى ئاماژەیە، تا ئێستا هۆکارى ئەو تاوانە ئاشکرا نەکراوە و نازانرێت بۆچی بە سێ کەسەوە هێرشیان کردووەتە سەر ئەو ژنە گەنجە.