بە ٢١ خاڵ دەرئەنجامی کۆبونەوەی پلاتفۆڕمی یەکێتی نەتەوەیی ژنانی کورد لە باشوور ڕاگەیەندرا
لەدوای ئەنجامدانی کۆبوونەوەی گشتی پلاتفۆرمی یەکێتی نەتەوەیی ژنی کورد لە باشوور، دەرئەنجامی کۆبوونەوەکە بە بەشداریی زیاتر لە ١٠٠ ژن لەسەر ئاستی ناوچە جیاوازەکانی هەرێمی کوردستانی باشوور، بە ٢١ خاڵ خرایە ڕوو.
سلێمانی
دوێنێ ٢٨ی شوبات لە کۆنگرەیەکی ڕۆژنامەنوسیدا پلاتفۆڕمی یەکێتی نەتەوەیی ژنانی کورد-باشوور دەرەنجامی کۆبوونەوەیەکیان لە بارەی پلاتفۆڕمەکەیان ڕاگەیاند.
شیرین تاهیر ئەندامی پلاتفۆڕمی یەکێتی ژنی کورد دەرئەنجامەکەی خوێندەوە و ڕایگەیاند: ئەنجامنامەی کۆبونەوەی گشتی پلاتفۆرمی یەکێتی نەتەوەیی ژنی کورد-باشوور، لە ٢٨ی شوباتی ٢٠٢٦ لە سلێمانی بەڕێوە چوو، ئەو کۆبوونەوەیە هەنگاوێکی تری ژنانە کە زیاتر لە ١٠٠ ژن لەسەر ئاستی ناوچە جیاجیاکانی هەرێمی کوردستانی باشوور بەشداریان تێدا کرد، پلاتفۆرمی یەکێتی نەتەوەیی ژنی باشوور، جەخت لە ئامانجی خۆی دەکاتەوە کە بۆ قۆناغی داهاتوو درێژە بە تێکۆشانی خۆی دەدات لەسەر نەخشە ڕێی پرسی ئازادی ژن و نەتەوە و لەو پێناوەدا بڕیاریدا:
١-گرنگی بدات بە یەکڕیزی تێکۆشانی ژن لە پێناو چارەسەری ڕیشەیی کێشەکانی ژنی کورد و کێشە نەتەوەیەکان و لەو چوارچێوەیەدا کار و چالاکیەکانی ئەنجامدەدات.
٢-هەوڵ دەدات بە بونیادێکی بەهێز هەنگاو بەرەو ئایندە بنێت و ئەندامانی کارا لە دەرەوەی پلاتفۆڕمەکە کۆبکاتەوە.
٣-گرنگی دەدات بە دۆخی هاوڵاتیانی کورد لە شنگال، پلاتفۆرمی ژنانی باشوور داوا دەدەکەن حکومەتی عێراق نەکەوێتە ژێر کاریگەریی سیاسەتی دەرەکی و دۆزی شنگال بە یاسایی بناسێنێت، هەروەها هێزی پاراستنی (یەبەشە) و(یەژەشە) و ئاسایشی ئێزیدخان بە فەرمی لەلایەن عێراقەوە بناسێنرێن.
٤-جەختکردنەوە لە پاراستن و توندوتۆڵکردنی ناوچە سنوورییەکانی، ئەو ناوچانەی پێیان دەگوترێت ناوچەی کێشە لەسەر، پێویستە هەوڵ بۆ گەڕاندنەویان بدرێت و بخرێنە سەر ناوچەی جوگرافی هەرێم.
٥-ژنانی پلاتفۆرمی باشوور هەڵوێستیان دەبێت بەرامبەر بە هەر توندوتیژییەکی فیزیکی، دەروونی و سێکسی کە بەرامبەر بە ژنان دەکرێت، بەهۆکاری سیاسی، کۆمەڵایەتی و ئابووری.
٦-ژنان هەڵوێستیان دەبێت بەرامبەر بە قەیران و شەڕ و ناکۆکیەکان کە دەکرێت لەهەر بەشێکی کوردستان و پشگیری لە تێکۆشانی بەشەکانی تری کوردستان دەکات.
٧-لە ئێستادا دەستەیەکی چەند کەسی ئەرکی پلاتفۆڕمی لە ئەستۆیە و لە داهاتوودا هەوڵ دەدرێت کەسانی تر بهێندرێنە ناو دەستەی بەڕێوەبردنی پلاتفۆرم.
٨-ژنانی پلاتفۆرمی باشوور هاوشان لەگەڵ پلاتفۆرمەکانی دیکەی کوردستان لە ڕێگەی کاری سیاسی و کۆمەڵایەتیەوە دژ بە هەر داگیرکارییەک و دۆخی نەخوازراو دەوەستێتەوە، هەوڵدەدەین ئاشتی و سەربەخۆیی بۆ میللەتەکەمان بەدی بهێنین.
٩-لەسەر ئاستی نەتەوەیی خەباتمان بەهێزتر دەکەین وەک ژنانی باشوور، هاوبەشی خەباتی پلاتفۆرمی بەشەکانی تری کوردستان دەبین، لە پاڵپشتی پڕۆسەی(پێڤاژۆ)ی نوێ بۆ چارەسەی پرسی کورد لە باکوور، هەروەها پاراستنی نەتەوەیی خۆسەری ڕۆژئاوا و تێکۆشانی ڕۆژهەڵات لە دژی زوڵم و فشاری دەوڵەتی ئێران بۆ سەر ئەو پارچەیە.
١٠-لە چوارچێوەی یاسا و دام و دەزگا نێودەوڵەتی و ناوخۆییەکانی گرنگی بە خەباتی دیبلۆماسی و سیاسی دەدەین، بە تایبەتی لەو پرسانەی پەیوەندیدارە بە پرسی توندوتیژی و کوشتنی بەکۆمەڵ و جینۆسایدکردن بە هۆی هێرشە داگیرکارییەکان.
١١-لە بابەتی توندوتیژی دژ بە ژنان، بەهۆی ئەو ماددە و بڕگانەی پەیوەستن بە ماف و ئازادییە تاک لانەیەکان لە ناو دەستوور و یاسادا، هەوڵدەدەین بە هەڵسەنگاندن و خوێندنەوەی ڕەخنەییانە کار بۆ هەڵوەشاندنەوەیان بکەین.
١٢- هەوڵ دەدەین پەیوەندی لەگەڵ ئەو تۆڕ و گرووپانە ببەستین کە کار و چالاکی بۆ ژنان ئەنجام دەدەن و پاڵپشتی ژنان دەکەن، لەبەرامبەر پرسە کۆمەڵایەتییە جۆراوجۆرەکاندا.
١٣- پلاتفۆرم هەوڵ بۆ هۆشیاری و زیندووێتی هزری ژن دەدات، لە ڕێی پانێڵ و سیمینارەکان و گفتوگۆ و نووسین و گوتاری بەرەنگاری و بەرهەڵستکاریەوە.
١٤- هەوڵ دەدەین ئەو مافە سیاسی وکۆمەڵایەتی و ئابوورییانەی ژنان بەدەستیان هێناوە بیپارێزین، ڕێگە نادەین هیچ گروپ و دەستەیەک بەناوی هەر ئایدیۆلۆژیایەکەوە ئەوەی بەدەست هاتووە لە ناوی بەرن.
١٥- پلاتفۆرم هەوڵ بۆ بووژاندنەوەی زمانی کوردی دەدات بە هەموو زاراوەکانیەوە.
١٦- پلاتفۆڕم کاردەکات دژی هەموو داگیرکاری دیموگرافی لە کوردستان بەگشتی و ناوچە جێناکۆکەکان بەتایبەتی.
١٧- ئەم پلاتفۆڕمە نابێتە پاشکۆیی هیچ ئایدۆلۆژیایەکی تر و کراوەیە بۆ هەموو بیروباوەڕێکی تر لە کوردستان.
١٨- هەڵوێست وەرگرتن دژی هەموو بڕیار و پلانێک کە دژی ناسنامەی نەتەوەی کوردە.
١٩- ئەم پلاتفۆڕمە هەوڵدەدات بە بوونی نوێنەر لە هەموو شار و شارۆچکەکان، دەبێت ژنان ڕۆلی خۆیان تێیدا بگێڕن.
٢٠- هەوڵ دەدات سەکۆیەکی ئەلیکترۆنی تایبەت بەم پلاتفۆڕمە دابمەزرێنێت.
٢١- لەداهاتوودا هەوڵ دەدات ئەندامەکانی ڕێکبخاتەوە و گرنگی بە پاراستنی بواری پەروەردە و تاکی کورد بدرێت.