ناوەندی هەواڵ

 

توێژینەوەیەک کە لەلایەن توێژەرانی زانکۆی ئێست ئەنگلیا لە بەریتانیا، نموونەی خانەی شێرپەنجەییان لە ١٩ کەس وەرگرت و ئاشکرایان کرد، جینێک بەناوی "RYNX2" لە سەرجەم خانەکانی تووشبووانی شێرپەنجەی ئێسک هەیە و هانی بڵاوبوونەوە و زۆربوونی خانە شێرپەنجەییەکان دەدات، بۆ ئەو مەبەستەش دەرمانێکیان بە ناوی "CDD522" دۆزیووەتەوە بۆ ڕێگریکردن لەو جینە.

 

تویژەران ئاماژەیان بەوەکردووە کە ئەو دەرمانە زۆربوون و بڵاوبوونەوەی خانە شێرپەنجەییەکان کەمدەکاتەوە و بەرگریی لاشە زیاتر هاندەدات بۆ لەناوبردنی خانە شێرپەنجەییەکان.

 

بە وتەی توێژەران، سەرقاڵی بەراوردکردنی توانای دەرمانەکەن لەسەر خانەکانی مرۆڤ، هاوکات چاوەڕێی دەزگای ڕێکخستنی دەرمان و بەرهەمەکانی چاودێریی تەندروستی لە بەریتانیا دەکەن بۆ ئەوەی ڕەزامەندیان پێبدرێت لە جێبەجێکردنی تاقیکردنەوە پزیشکییەکانی دەرمانەکە لەسەر مرۆڤ.

 

رێکخراوی تەندروستیی جیهانی "WHO" ئاشکرایکردووە کە شێرپەنجەی ئێسک سێیەم باوترین شێرپەنجەی ناو منداڵانە و لە جیهاندا ساڵانە زیاتر لە ٥٢ هەزار کەس تووشی دەبن کە زۆرینەیان گەنج و منداڵن.