پڕۆژە پێشنیازی شیعەکان لە پەرلەمانی عێراق چیمان پێدەڵێت؟

 

لەم چەند ڕۆژەی ڕابردوودا چەندین هەواڵمان گوێ لێبوو سەبارەت بە هەموواری یاسایی باری کەسێتی ژمارە (١٨٨)ی ساڵی ١٩٥٩، هەڵبەت یەکێك لەو بەهانانەی باس دەکرێت ڕێکەوتنی سیاسییە لە نێوان باڵی سوننەکان و باڵی شیعەکان لەپێناو دەرچواندنی یاسایی لێبوردنی گشتی و بەردانی کۆمەڵێک زیندانی، وە بابەتێکی دیکەمان گوێ لێدەبێت، ئەویش ئەوەیە شیعەکان ئێستا لە دەسەڵاتدان و دەیانەویت سودی لێوەرگرن تا مەزهەبی جەعفەری پەیڕەو بکەن، لە بەرامبەریشدا سوننەکان ئازادن مەزاهەبەکانی خۆیان پەیڕەو بکەن، بۆ نموونە شافعی، مالکی یان حەنەفی. خاڵیكی دیکە ئەوەیە کە بە ئێرانکردنی عێراقە، وە ئێران دەیەوێت هەژموونی خۆی بە هەموو شێوەیەك بەسەر عێراقدا بسەپێنێت، و سەرانی شیعەی عێراقی پێویستە ملکەچی ستراتیژی ئێران بن.

 

ئەوەی کە من دەمەوێت تیشك بخەمە سەری ئەوەیە، هەر کام لەم ئەگەرانە بۆ ئەنجامدانی ئەم هەمووارە، عێراق دەکاتە زیندانیكی گەورە بۆ منداڵانی کچ و پەراوێزخستنیان لە گەشەکردن و پێگەیاندن لە بوارە جیاوازەکان، کە لە سەروو هەموویانەوە بە سێکسواڵەکردنیان و دەستدرێژیکردنە سەریان، ئەمەش زەمینەسازییە بۆ دروستکردنی شەپۆلێک لە ژنانی عێراقی دوور لە هەموو پێشکەوتنێکی دنیای ئەمرۆ، خوێندن و خوێندەواری، بەشداری لە ژیانی گشتی، بەشداری لە کایەی ئابووری، سیاسی، ڕۆشنبیری و فەرهەنگی و هتددا...

 

لە بەرامبەر ئەمەدا، ئەوەی جێگەی دڵخۆشی و سەرنجدانە، دەنگێکی زۆر بەهێز هەیە لەناو شەقامی عێراق و کوردستان، کە ڕەفزی ئەو پرۆژە پێشنیازە دەکات و ڕەتیدەکاتەوە، تا عێراق بکاتە وڵاتێکی مەزهەبی و پیاوانی نوێنەری مەزاهبەکان بە سوننەشەوە دەست ئاواڵا بکات لەوەی لە دەرەوەی دادگا خۆی بڕیاردەر بێت، ئەمەش کاری چەند ساڵەی ئازادیخوازان و یەکسانیخوازان لەباردەبات لە عێراق و کوردستانیش بەناڕاستەوخۆ.

 

بابەتێکی دیکە گرنگە بە ڕوونی حزبە کوردییەکان پێمان بڵێن چیدەکەن؟ چونکە بە بێدەنگی ناتوانین هیچیان لێوەرگرین، یاخود ناتوانن ڕاستەوخۆ بڵێن ئێمە لەگەڵ ئەم پرۆژە پشێنیازەدا نین، ئایا دەتوانن بەیانێك دەربکەن بە دەنگی بەرز باس لە خراپی و هۆکاری وێرانکردنی کۆمەڵگا بکەن بەهۆی یاسایەکەوە، کە کچی ٩ ساڵ دەدات بەشوو؟ ٦٤ پەرلەمانتارمان لە عێراق هەیە، بەڵێ بیستمان لەگەڵیدا نین، بەڵام گرنگە ڕوون بن، دڵی شیعەکان ڕانەگرن، بۆ یەکجارێش بێت ڕای خۆیان بڵێن، چونکە (میشێل فۆکۆ) دەڵێت هەموو نەکردەیەک دەبێتەوە بە کردە.

 

خاڵێکی دیکە، باس لەوە دەکرێت سەرۆك کۆمار واژووی کۆتایی لەسەر هەموواری ئەو یاسایە دەکات، وە دەشتوانێت نەیکات و ئۆتۆماتیکی ڕەزامەندی نیشاندەدات، ئایا چی دەکات؟ وە ئێمە چی دەکەین ئەگەر گریمان وادەرچوو بابەتەکە چوە لای سەرۆکی کۆمار.

 

ئەوەی من دڵخۆش دەکات ئەو ژنانەن لەسەر شەقامەکان هاواری لابردنی ئەم پرۆژە پێشنیارە مەزهەبیە دەکەن و دەڵێن لایببەن پڕۆژەکەتان، نا بۆ بەشوودانی منداڵ، نا بۆ دەستدڕیژی سێکسی بۆ سەر منداڵان، پێموایە ئەمە ئەرکی تەنها داکۆکیکاران و ڕێكخراو و کەسایەتیەکان نییە، تا لە بەرامبەر تێکدانی ژیانی منداڵان بوەستنەوە، بەڵكو ئەرکی هەموومانە کاری لەسەر بکەین و ڕەتیبکەینەوە، بە شیێوەی جیاواز.

 

ئەو کات هەموومان بڵێین مارەیی نایەت.