نورشان عەبدی

 

کۆبانێ-بە ئامانجی هاندانی ژنان بۆ کارکردن و پشتبەستن بەخۆبوون و بەهێزکردنیان لەڕووی ئابوورییەوە، لیژنەی ئابووری کۆنگرەی ستار لە کۆبانی ڕۆژئاوا، چەندین پڕۆژەی بۆ ژنان دەستپێکردووە، لەوانە پرۆژەی "ماڵی دابینکردن"، ئەم پڕۆژەیە کە پێنج ساڵە لەسەریەک بەڕێوەدەچێت، ساڵانە لە مانگەکانی هاوینەوە تا سەرەتای زستان کاردەکات و نزیکەی دە ژنن.

 

ساڵانە لە مانگەکانی هاوین و پاییزدا کاری ژنان زیاد دەکات، بەو پێیەی دەست دەکەن بە ئامادەکردنی خۆراکی زستانە، کە ئەمە نەریتێکی لەمێژینەی خەڵکی کۆبانئیە، بە نەوەکاندا دەگوازرێتەوە، بەرهەمی دانەوێڵە وەک گەنم و نۆک و نیسک و پەلەوەری تر هەڵدەگرن، هەروەها هەموو جۆرە سەوزەیەک وشک دەکەنەوە و جۆری پارێزراو دروست دەکەن. خۆراکی زستانە بە سەرچاوەیەکی ئابووری گرنگ و بنەڕەتی بۆ هەموو ماڵێک دادەنرێت.

 

بۆ زانیاری زیاتر لەسەر پڕۆژەی "ماڵی دابینکردن" و سروشتی کاری ژنان لەناویدا و ئامانجەکەی و گرنگییەکەی بۆ ژنان، ئاژانسەکەمان چاوپێکەوتنی لەگەڵ ئەو ژنانە ئەنجامدا کە لەوێ کاردەکەن.

 

هەلی کار بۆ ژنان و پاڵپشتی بۆ ئابووری ناوخۆیی

سەبارەت بە ئامانجی دەستپێکردنی پڕۆژەی "ماڵی دابینکردن" لەلایەن لیژنەی ئابووری کۆنگرەی ستار، شیراز ئیبراهیم، سەرپەرشتیاری پڕۆژەکە لە کۆبانێ، ڕوونیکردەوە، ئامانجی سەرەکی ئەم پڕۆژەیە هاندانی ژنانە بۆ چوونە ناو بازاڕی کار و بەشداریکردنە لە باشترکردنی بارودۆخی ئابوورییان، بەتایبەتی ژنانی کرێکار و ئەوانەی بەدوای کاردا دەگەڕێن، لەڕێگەی ئەو جۆرە پڕۆژانە کۆنگرەی ستار هەوڵدەدات کەشێک بۆ ژنان دابین بکات و بەهێزیان بکات بۆ دەستڕاگەیشتن بە کار، هەروەها دەرفەتەکان کە یارمەتیان دەدەن بۆ بەدەستهێنانی سەربەخۆیی ئابووری و بەهێزکردنی ڕۆڵییان لە کۆمەڵگەدا.

 

ئاماژەی بەوەشکرد، پڕۆژەکە وەڵام و قبوڵێکی بەرچاوی لەلایەن دانیشتوانی کۆبانێ وەرگرتووە، سەرەڕای دەستپێکردنی بە سەرچاوەیەکی سنووردار و قەبارەیەکی کەم، لەگەڵ ئەوەشدا، ئاواتەخوازی ئێمە پەرەپێدان و فراوانکردنی پڕۆژەکەیە، ئەمەش وامان لێدەکات بتوانین بگەینە زۆرترین ژمارەی ئەو ژنانەی ئارەزووی کارکردنیان هەیە و هەلی کاری گونجاویان بۆ دابینبکرێت، بەمەش بەشدار دەبین لە پاڵپشتیکردنیان و باشترکردنی بارودۆخی ئابووری و ژیانیان.

 

ڕوونیکردووە، ژمارەی ئەو ژنانەی کە لەم پڕۆژەیەدا کاردەکەن دەگاتە ١٠ کەس، ئەم ژمارەیەش بەپێی خێرایی کارکردن زیاد دەکات، بەو پێیەی لە کاتژمێر ٨:٠٠ بەیانی تا ٣:٠٠ت پاشنیوەڕۆ کاردەکەن، وتی: ئەم جۆرە پڕۆژە و کارە پێویستی بە چاودێری و پاک و خاوێنی هەیە، بۆیە هەموو ئەوانەی لێرە کاردەکەین بە پلەی یەکەم سەرنجمان لەسەر پاک و خاوێنی شوێنەکە و ئەو کەرەستانەیە کە ئامادەی دەکەین.

 

لە کۆتاییدا، شیراز ئیبراهیم جەختی لە گرنگی بەردەوامبوون لە پاڵپشتیکردنی ئەم جۆرە پڕۆژەیە کردەوە بە مەبەستی ڕەخساندنی هەلی کاری زیاتر بۆ ژنان و باشترکردنی بارودۆخی ئابوورییان.

 

ئەلماز محەمەد، کە لە سەنتەری پاراستنی خۆراک کار دەکات، وتی: کارکردن لەسەر ئەم پڕۆژەیە سەرچاوەی داهاتە بۆ ئێمە، دوو ساڵ لەمەوبەر دەستم بە کارکردن کردووە لێرە بۆ دابینکردنی پێداویستییەکانی منداڵەکانم، بۆ من و هەموو ئەو ژنانەی لێرە کاردەکەن، ئەم پڕۆژەیە دەرفەتێکی باشە بۆ ئەوەی پشت بەخۆمان ببەستین.

 

سەبارەت بە سروشتی کارەکەش ڕوونیکردەوە، ئێمە دۆشاوی تەماتە و بیبەر دروست دەکەین، هەروەها نۆک و فاسۆلیا و بامیە و گەڵای ترێی وشک دەکەینەوە، هەروەها کولەکە و خەیار و باینجان وشک دەکەینەوە، هەموو جۆرە مرەبایەک ئامادە دەکەین، وەکو مرەبای هەنجیر و قەیسی، هەروەها ئەو پارێزراوانەی کە لە پەنیر دروستکراون.

 

ئاماژەی بەوەشکرد، ئێمە بە ڕۆحێکی دڵخۆش و یەکگرتوو دەست بە کارەکانمان دەکەین، دەست بە دەست کاردەکەین بۆ ئەوەی ئەم پڕۆژەیە سەرکەوتوو بێت، بە لەبەرچاوگرتنی گرنگییە گەورەکەی بۆ ئەو ژنانەی کە ناتوانن لەو دامەزراوانەدا کاربکەن کە پێویستیان بە بڕوانامە هەیە، هەلی کار بۆ ژنان دەڕەخسێنێت.

 

لەکۆتایی لێدوانەکەیدا، ئەلماز محەمەد باسی لە سەختییەکانی ئەم کارە کرد و وتی: هیچ کارێک ئاسان نییە، کارەکانی ئێرەش زۆر داواکاری و ئاڵەنگارییە، بەڵام ئێمە بە پەرۆشەوە کاردەکەین بۆ ئەوەی بارگرانییەکە کەم بکەینەوە و تەواوی بکەین.