شیرین ساڵح

 

سلێمانی- ئامێرە موزیکیەکان هەریەکەیان مێژوویەکی دێرینیان هەیە و هەریەکەیان مێژووی کۆمەڵگەیەکی پێ دەناسرێتەوە، گەلی کوردیش خاوەنی چەندین جۆر ئامێری مێژوویە وەک تەپڵ، دەهۆڵ، دەف، ساز و تەمبور و ...هتد، بەڵام لەبەر زاڵبوونی ئەقڵیەتی پیاوسالاری و دابونەریتی کۆن بەسەر کۆمەڵگەکان و لە ناویشیاندا کۆمەڵگەی کوردی، وای کردووە ژەنینی بەشێک لە ئامێرەکان تایبەت بێت بە پیاوان، بە تایبەتی تەپڵ، بەڵام ژنان توانیویانە دەستێکی باڵاتریان هەبێت لە ژەنینی ئامێرەکانی تری وەک و ساز و تەمبور و کولتووری کوردی پێ بپارێزن.

 

"کۆمەڵگە بە عەیبەی دەزانێت ژن بەشداری کایەی هونەری بێت"

مەهشید موشەهشەهی، ژەنیاری ئامێری تەمبور ئاماژەی بەوەکرد، ماوەی ٤ ساڵە ژەنیاری ئامێری تەمبورە، لەبەرئەوەی خێزانەکەی و بە تایبەتی باوکی هونەرمەند و ژەنیاری ئامێری تەمبورە، هەر لە منداڵیەوە بەو ئامیرە گۆشکراوە، لە بارەی ڕۆڵی ژنان لە هونەردا دەڵێت: ئێمەی ژنان دەستێکی باڵامان هەیە لە ناساندی ئامێرە موزیکیە کوردەوارییەکان بە وڵاتانی دەرەوە، بەڵام لە باشووری کوردستان ڕێگری دێتە بەردەمی ژنان، کاتێک بیانەوێت بێنە ناو هونەرەوە، هۆکاری ئەو ڕێگریانەش دەگەڕێتەوە بۆ ئەوەی هونەر لە کۆمەڵگەی باشووردا هەستیارە بۆ ژن، بەڵام ئەگەر ژنان خۆیان بیانەوێت دەتوانن ڕووبەڕووی ئەو ڕێگریانە ببنەوە و بەشداری ناو کایەی هونەری بکەن، بۆ ئەوەش دەبێت زانکۆکان ئەوانەی پەیوەندیان بە هونەرەوە هەیە پەرەیان پێبدرێت و هەوڵ بدەین ڕووبەڕووی ئەو ئەقڵیەتە پیاوسالاریە بوەستینەوە، کە زاڵ بووە بەسەر کۆمەڵگەدا.

 

"سەرکەوتنی ژن سەرکەوتنی کۆمەڵگەیە"

مەهشید هوشەهشەهی ڕوونی کردەوە، زۆرجار کاتێک ژنێک لە هونەردا ئاستێکی باڵا بەدەست دەهێنێت، لەلایەن بەشێک لە کۆمەڵگە و دەوڵەتە داگیرکەرەکانەوە ڕەتدەکرێتەوە و چاویان بەو سەرکەوتنە هەڵنایەت و هەوڵدەدەن لە ئاستی هونەری ژنان بهێننە خوارەوە، چونکە دەزانن سەرکەوتنی ژن سەرکەوتنی کۆمەڵگەیە و کۆمەڵگە ئازاد دەبێت، بۆیە ئەوانیش دەیانەوێت ڕێگری لە ئازادی کۆمەڵگە بکەن.

 

وتیشی: تەمبور و ساز لەو ئامێرانەن هەر لەگەڵ مێژووی کوردەواریدا هەن و بوون بە دەنگی ئازادی و خەبات، لە ئێستاشدا ژەنیاری ژنی زۆر باشی ئەو دوو ئامێرە هەیە و هەوڵی پاراستنی دەدەن، بەڵام ژەنیاری ژنی ئامێری تەپڵ و دەف لە باشووری کوردستاندا کەمە، بەهۆی دابونەریتەوە کە تا ئیستا وا دانراوە، تەپڵ تایبەتە بە پیاوان، بۆیە بێگومان هەر ژنێکیش بێتە ناو بواری هونەرەوە، ژنێکی بە ئیرادەیە و دەتوانێت سەرکەوتن بە دەست بهێنێت.

 

"لە باشووری کوردستان گۆڕانکاریەکی بەرچاو لە ئەقڵیەتی پیاوسالاری نابینرێت"

مەهشید موشەهشەهی ئەوەشی خستەڕوو، چوار پارچەی کوردستان لە بواری ئازادی ژن و بەشداری ژنان لە هونەردا هاوشێوە نین، لە پارچەکانی تری کوردستان گۆڕانکاریەک لە ئەقڵیەتی پیاوسالاری دەبینرێت، بەڵام ئەو گۆڕانکاریە هێشتا لە باشوور بە شێوەیەکی بەرچاو دەرنەکەوتووە، بەڵام ئەوەش دەبینین کە ژنان هەوڵ دەدەن ئەو ئەقڵیەتە بگۆڕن، چونکە ئەو ئەقڵیەتە وای کردووە هەرچەندە ژنی بە توانامان هەبێت لەو بوارەدا، بەڵام کەم دەربکەون، ژن لەگەڵ هونەر دێتە دنیاوە، لەبەر ئەو هەستە جوانەی هەیەتی، بۆیە دڵنیام ژن ئەگەر خۆی بیەوێت و هەوڵی بۆ بدات دەتوانێت ببێت بە باشترین هونەرمەند، چونکە هونەر بەشی هەرە گرنگی ژیانی هەموو مرۆڤێکە، ژنیش لەبەرئەوەی بناغەی کۆمەڵگەیە پەیوەندیەکی گرنگ ئەم دووانە بەیەکەوە گرێ دەدات.

 

مەهشید لە کۆتایدا وتی: یەکێک لەو ڕێگایانەی دەتوانین شۆڕشەکانمانی پێ بەرەو پێشەوە ببەین، ڕێگای هونەرە، لە کۆمەڵگەی کوردیشدا ژنانی پێشەنگامان زۆرە کە هەوڵیان داوە کولتووری کوردی بە ئامێرە مێژوویەکان بەرەو پێشەوە ببەن، منیش هەوڵدەدەم ببم بە پێشەنگ و ڕێگایەک بۆ ئەو ژنانەی دەیانەوێت بێنە ناو کایەی هونەرەوە، هیوادارم ئەو ژنانەشی ڕێگریان لێ دەکرێت، ڕووبەڕووی ئەو ڕێگریانە ببنەوە و بەشداری لە بواری هونەردا بکەن.