Navenda Nûçeyan- Malpera Dengê Binçavkiriyên Kurd û Îranê ragihand ku jineke Kurd a bi navê Şeyda Ezîzî ya ji bajare Sineyê yê Rojhilatê Kurdistanê ye, ji aliyê şaxas yekem a Dadgeha Şoreşê ya Sineyê ve bi tometa ‘hewldana ji bo xirabkirina ewlehiya neteweyî’ sê sal cezayê girtîgehê lê hatiye birîn.

Hat diyarkirin ku Şeyda Ezîzî di dema şerê 12 rojan ê Îran û Îsraîlê de li Sineyê bêyî fermana dadwer hatibû binçavkirin û wê şandibûn girtîgeha bajêr.

Her wiha hat ragihandin ku du girtiyên jin ên siyasî yên li girtîgeha Evînê bi navê Merziye Farisî û Ferûx Teqî Pûr bi pirsgirêkên fîzîkî re rû bi rû ne û nayên dermankirin.

Li gorî heman çavkaniyê her du girtiyên siyasî di sala 2023’yan de di dema salvegera xwepêşandanên Şoreşa ‘Jin, Jiyan, Azadî’ de hatibûn binçavkirin û wan şandibûn girtîgeha Evînê. Yek ji girtiyên jin ên siyasî piştre ji aliyê dadwer Îman Efşarî ve li dadgeha Şoreşê ya Tehranê bi tometa ‘pêwendiya bi muxalefeta li dijî Îranê re’ bi 15 sal cezayê girtîgehê hatibûn mehkûmkirin.