Navenda Nûçeyan – Di van demên dawî de bajarê Suweydayê şahidiya pêleke nû ya tundiya li dijî civaka Durzî kir. Êrîşên sîstematîk bûn sedema  mirina gelek kesan ku di navbera wan de jin jî hene.

'Ev êrîş rûmeta mirovan û azadiya jinan hedef digre'

Fermandariya Giştî ya Yekîneyên Parastina Jin (YPJ) duh daxuyaniyek weşand û komkujiyên li dijî gelê Durzî şermezar kir. Di daxuyaniyê de wiha hat gotin: "Em piştgiriya xwe ji bo jin û sivîlan diyar dikin. Komên cîhadîst ên tundrew ên bi serokatiya rêveberiya Şamê, careke din sivîlên bêguneh hedef girtine. Ev tundiya sîstematîk a li dijî Durziyan û komkujî û êrîşên hovane yên li ser jinan, gefek rasterast li ser rûmeta mirovan û azadiya jinan in. Armanca revandina jin, zarok û sivîlan li dijî her têgehek exlaqî yan mirovî ye û têgehên bi vî rengî dijminatiya baweriyên cihêreng, azadiya gelan û hebûna jinan dikin.

'Em li kêleka gel û jinên Durzî ne'

Di nava daxuyaniyê de YPJ'ê da zanîn ku gelê Durzî ne bi tenê ye û ew amadekariya xwe ji bo her cure êrîşan li dijî îradeya gelan dikin û wiha hat gotin: “Eger ji me were xwestin em amade ne li hemberî hemû êrîşên ku jinan hedef digrin, bisekinin. Ji bo parastina jinên Durzî û sivîlan, em ê bê dudilî hemû berpirsiyariya ku li ser me ye bigrin. Weke Yekîneyên Parastina Jin li hember êrîşên li ser jinan û gelên bindest li her deverê ku ew lê bin ne tenê erkê me ye bingeha hebûna me ye. Divê destûr neyê dayîn ku ji têkoşîna ji bo wekheviya gelan, azadiya jinan û jiyana hevbeş a di navbera olan de jî paşve gav bê avêtin. Em li kêleka civaka Durzî ne dê jin qet bêdeng nabin û serê xwe netewînin."