MIHRÊBAN SELAM

Helebçe – Ji temenê biçûk ve avakirina hişmendiya jîngehê, alîkariya zarokan dike ku di tevahiya jiyana xwe de têkiliyek xurt bi xwezayê re ava bikin. Ev dihêle ku ew hevxemiya xwe li hember zindiyan bipêş bixin û hestek bihêz a berpirsyariya kesane bi dest bixin. Ew nifşên pêşerojê ji bo rûbirûbûna bi pirsgirêkên gerdûnî re çêtir amade dike. Rêbazên bi bandor ji bo fêrkirina ciwanan li ser têgehên jîngehê ew e ku meriv wan mijûl bike ne ku wan bitirsîne û wan bi çalakiyên pratîkî piştgirî bike. Mezin dikarin bi tevgerên rojane yên wekî teserûfa enerjiyê, vemirandina roniyên nehewce û karanîna berhemên paşvezîvirandinê mînakek bidin. Xwendina pirtûkên guncaw ên temenî li ser heywanan û xwezayê jî hişmendiya ekolojîk zêde dike.

Paqijkirina jîngehê ji bo pêşîgirtina li qirêjiyê û parastina çavkaniyên xwezayî elimandinên biçûk lê domdar hewce dike. Gavên sereke, kêmkirina plastîkên yekcar bikarhatî, parastina av û enerjiyê û avêtina bermayiyan a bi rêkûpêk in.

‘Geştiyar xwezayê bi awayê ku tê xwestin paqij nahêlin’

Rêvebera Giştî ya Şaredariyên Helebceyê Xêlan Abdulrahman, li ser vê mijarêji ajansa me re axivî. Xêlan diyar kir ku bi hatina biharê re, tîmên wan bi berdewamî bermahiyên ku ji hêla geştiyaran ve hatine hiştin berhev dikin û wiha got: “Karê tîmên jîngehê pir zêde bûye. Ji ber ku hejmareke mezin ji geştiyaran hatine herêmê. Bi taybetî Newrolî (sînorê parêzgeha Helebce, deverê Şahrezor) îsal bûye navendeke geştiyarî ya girîng. Me xwest ku em piştgiriyê bidin tîmên jîngehê. Bi rastî jîngeh pir qirêjî ye. Tevî ku ji meha Nîsanê ve kampanyayên hişyarkirinê têne kirin û hemû hişyariyên pêwîst têne kirin jî, mixabin geştiyar nekarîne jîngehê wekî ku divê biparêzin. Em çend roj in herêma Newrolî paqij dikin û em ji hemû mêvanên Helebceyê dixwazin ku jîngehê paqij bihêlin. Ev hewldan dê berdewam bikin.”

‘Bila hemû dibistan û dêûbav zarokan ji biçûktiyê ve perwerde bikin’

Xêlan daxwaza pêkanîna bernameyên jîngehê di dibistanan de di sala bê de kir û wiha pê de çû: “Daxwaza min ji hemû dibistan û dêûbavan ev e ku zarok ji temenê biçûk ve bi hişmendiya jîngehê werin mezinkirin. Divê em zarokan fêrî hezkirina xwezayê û paqijkirina wê bikin. Divê pêşî li avêtina çopê ji zarokan were girtin. Ji ber vê yekê, pir girîng e ku dibistan kampanyayên hişyariyê yên dijwar organîze bikin û perwerdehiya pratîkî bidin. Divê em li mal û li cihên kar jî berpirsyariya takekesî bigrin ser xwe da ku em barê li ser xebatkarên jîngehê, kêm bikin. Em dixwazin ku hemû welatî beşdarî vê pêvajoyê bibin. Em niha li Navroliyê paqijiyê dikin û em ê di rojên pêş de biçin herêma Hewramanê. Ev hewldan dê bi berdewamî berdewam bikin û her kesê ku hesas e, dikare beşdarî pêvajoya parastina jîngehê bibe.”

Rojane 70 heta 100 ton bermayiyên geştiyaran tên berhevkirin

Di dawiya axaftina xwe de, Xêlan Abdulrahman diyar kir ku di kampanyayên rojane de di navbera 70 û 100 ton bermahî tên berhevkirin û bi tevahî di mehekê de 355 ton bermahî tên berhevkirin. Wê tekez kir ku ev rêjeyek pir zêde ye û wiha lê zêde kir:"Em ji welatiyan dixwazin ku di dema rêwîtiyên xwe de li gorî rêzikan tevbigerin. Parastina jîngehê ne bi meqam an asta perwerdehiyê ve girêdayî ye; ew bi tevahî bi awayê ku mirov bi jîngehê re tevdigerin ve girêdayî ye. Her perçeyek bermayiyê ku tê avêtin, barekî zêde li ser xebatkarên jîngehê datîne."