Hesekê – Bi armanca şermezarkirina tecrîda li ser Rêberê Gelê Kurd Abdulah Ocalan, pêkhateyên bajarê Hesekê bi hemû netewyên xwe Kurd, Ereb, Suryan û Ermen daketin qadan û meşek li dar xistin.

Meşvan wêneyên Rêberê Gelê Kurd Abdulah Ocalan, alên Kongra Star, Tevgera Civaka Demokratîk TEV-DEM, PYD’ê û pankartên bi nivîsa “Em ê bi berxwedanî û tekoşînê tecrîda li ser Rêber Apo bişkînin” hilgirtin. Saziyên civaka sivîl , kongra Star, Meclisa Civaka Ermen, Yekîtiya Jınên Ermen beşdarî meşê bûn. Meş li ber Gulîstana Rêber Ocalan a taxa Nasra dest pê kir û li ber Navenda Şaredariyan a taxa Kelasê bi daxuyaniyek bi dawî bû.

‘Heya tecrîd neşkê wê têkoşîn bidome’

Piştî deqeyek rêzgirtinê endamê Partiya Yekîtiya Demokratîk PYD’ê Ebid Xenî Oso axivî û got: “Rêber Apo ji bo tevahî gelên herêmê lêveger û xelasiya ji jiyana bindestiyê ye. Bi saya fikir û felsefeya Rêber Apo hemû pêkhate xwe di bin sîwana Netewa Demokratîk de xwe birêxistin dikin û xwe diparêzin. Li ser vê pergalê jî êrîş û gef hene pê ve girêdayî tecrîda li ser Rêber Apo dewam dike. Armanca tecrîdê têkbirina Netewa Demokratîk e. Peyama me jî li hemberî vê armancê ew e ku heya em tecrîd neşkînin û Rêber Ocalan bi awayekê fîzîkî azad nebe em ranawestin, em ê her kêlî di nava berxwedaniyê de bin. Erk û berpirsiyariya her welatparêzekî ye ku ji bo azadiya fîzîkî ya rêber Ocalan têbikoşe.”

Meş bi dirûşmeya “Bê Serok Jiyan Nabe” bi dawî bû.