Navenda Nûçeyan -  Bi boneya Roja Navneteweyî ya Bidawîkirina Bêcezabûnê ji bo Tawanên li dijî Rojnamevanan, Navenda Parastina Mafên Rojnamevanan (Metro Center) daxuyaniyek nivîskî weşand.

Di daxuyaniyê de hate destnîşankirin ku li Başûrê Kurdistanê, girêdayîbûna sîstema dadweriyê bi partiyên siyasî yên desthilatdar rê li ber lêpirsînên serbixwe û cidî yên li ser kuştina rojnamevanan digire. Di daxuyaniyê de hate destnîşankirin ku lêpirsîn bêyî ku sûcdar û kesên ku sûc plan kirine werin dîtin û radestî dadgehê werin kirin, têne girtin. Navenda  Metro daxwaz kir ku ev doz ji nû ve werin vekirin û edalet ji bo kesên bandordar were bicîhanîn.

Bangek ji bo saziyên navneteweyî

Daxuyaniyê her wiha bang li saziyên navneteweyî kir û hişyarî da ku bêcezatî ji bo binpêkirinên mafên mirovan ên cidî, gendelî û sûcan dikare zirarê bide tevahiya civakan. Ji ber vê yekê, bang li hikûmetan, rêxistinên civaka sivîl, dezgehên medyayê û hemî kesên ku ji bo serweriya hiqûqê parêzvana  kir ku tevlî hewldanên gerdûnî bibin da ku bêcezatî bi dawî bibe.

Sûcdar bê ceza man

Li gorî daneyên Rêxistina Perwerde, Zanist û Çandê ya Neteweyên Yekbûyî (UNESCO), di navbera salên 2025 û 2026’an de li çaraliyê cîhanê 166 rojnamevan hatine kuştin. Hat ragihandin ku di heft ji van dozan de lêpirsîn bi dawî nebûne û sûcdar bê ceza mane.

Li Başûrê Kurdistanê jî hate diyarkirin ku di encama êrîşên hêzên girêdayî rêveberiya herêmê yan jî wesayîtên çekdar ên girêdayî TIR’ê de Abdulstar Tahir Şerîf, Serdeşt Osman, Kawa Germiyanî, Soranî Mamahme, Vedat Huseyîn, Şukrî Zeynedîn, Azîz Koyluloğlu, Gulistan Tara û Hêro Bahadîn jiyana xwe ji dest dane. Di daxuyaniyê de hate destnîşankirin ku di tu ji van bûyeran de berpirsyar nehatine darizandin.