Navenda Nûçeyan – Tora Mafên Mirovan a Kurdistanê di rapora îro weşandî de, ragihand ku gef li welatiyên li deverên sînor ên Pawe, Merîwan, Bane û Serdeştê dijîn hatiye xwarin.  

Li gorî raporê, hêzên Muhafizên Şoreşê, gef li welatiyên ku li xeta sînor a Herêma Kurdistanê dijîn xwariye û di mijara çûyîn û hatinê de ya li ser xeta sînor ew hişyar kirine. Her wiha şertên şer wek hincet nîşan dan û gotin ku ew hêzên leşkerî xwedî erkê guleberandana li ser welatiyane.

Di raporê de hate diyarkirin ku li gorî agahiyên welatiyên li deverên sînor yên Pawe, Merîwan, Bane û Serdeştê dijîn, hêzên Muhafizên Şoreşê yên Artêşa Sînor qereqolên sînor vale kirine û li mizgeftên gund û deverên çiyayî bi cîh bûne.

Hate diyarkirin ku ev hêz hemû tevgerên ber bi deverên sînor ve qedexe kirine û kesên ku li van deveran hatine dîtin bêyî hişyariyekê gefa ku wê gule li wan were reşandin xwarin e.

Duh, Tora Mafên Mirovan a Kurdistanê ragihandibû ku hêzên ewlehiyê li bajarên Kurdan li mizgeft, dibistan, saziyên dewletê, navendên werzîş û çandî bicihbûne.

Li gorî raporê, tevî nerazîbûnên gel, hêzên leşkerî hîn jî li cihên bicihbûnê dimînin. Hate diyarkirin ku li hinek gundan gel rû birûyî hêzên Muhafizên Şoreşê hatine û zorî li wan hatiye kirin, gel xwestine ew ji mizgeft û qadên din ên civakî derbikevin.